Elmira Bositxonova bir vaqtning o‘zida ham O‘zbekiston xotin-qizlar qo‘mitasi raisi, ham Bosh vazir o‘rinbosari sifatida ikkita lavozimda ishlashiga izoh berdi. U bu haqda jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
“Xalqaro tashkilot vakillari O‘zbekistonga kelganida, ‘O‘zbekiston Xotin-qizlar qo‘mitasi raisi nima uchun ham Bosh vazir o‘rinbosari, ham qo‘mita raisi’, degan savolni berishganda mening javobim quyidagicha bo‘lardi: bitta ayolning muammosini yechish maqsadida vazirliklar, jamoat tashkilotlarini safarabar qilish uchun men darrov Bosh vazir o‘rinbosari bo‘lib qolaman. Qaysidir bir idoraga, jamoat tashkilotiga kirib borish kerak bo‘lsa, unda davlat idorasining vakolati bo‘lmagan joylarda men darrov jamoat tashkiloti rahbari bo‘lib qolaman. Bitta ayolni qo‘llab-quvvatlash uchun bu ikkita tirgak juda ham muhim. Aks holda Bosh vazir o‘rinbosari bajarishi mumkin bo‘lgan narsani jamoat tashkilotining rahbari qilolmaydi. Jamoat tashkilotining rahbari qadam bosadigan joyga Bosh vazir o‘rinbosari kira olmasligi mumkin”, — dedi Elmira Bositxonova.
Ma’lumot uchun, O‘zbekiston Prezidentining “O‘zbekiston Respublikasi Hukumati ishini tashkil etishning sifat jihatidan yangi tizimini joriy etish to‘g‘risida”gi qaroriga mavofiq O‘zbekiston Xotin-qizlar qo‘mitasi raisi bir vaqtning o‘zida O‘zbekiston Bosh vaziri o‘rinbosari hisoblanadi.
Elmira Bositxonova 2019-yilning iyun oyida O‘zbekiston Xotin-qizlar qo‘mitasi raisligi va Bosh vazir o‘rinbosari lavozimiga tayilangan. Bungacha Bositxonova 2016-yilning 12-dekabridan buyon Sog‘liqni saqlash vaziri o‘rinbosari lavozimida ishlab kelayotgandi. U 2011—2016-yillarda ham Xotin-qizlar qo‘mitasiga rahbarlik qilgan. Bositxonova ushbu lavozimda ishalb kelgan Tanzila Norboyeva o‘rnini egallagan, Norboyeva esa Oliy Majlis Senati raisi etib saylangan.
Izoh (0)