Ayrim oliy ta’lim muassasalarida poraxo‘rlik, korrupsiya holatlari kuzatilishida talabalarning ham “hissasi” bor. Guruh yetakchisi yoki o‘qituvchi baho evaziga pul so‘ragan bo‘lsa, talaba bu haqda xabar qilmagan, oqibatda ta’lim tizimida poraxo‘rlik, korrupsiya ildiz otib boravergan.
Prezidentning 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi farmoniga muvofiq oliy ta’lim tizimida “Korrupsiyasiz soha” loyihasini tayyorlash va amalga oshirish vazifasi yuklatilgan.
Mazkur loyiha doirasida Oliy va o‘rta maxsus ta’lim vazirligi hamda OTMlar rektorlari O‘zbekiston xalqiga murojaati yo‘lladi. Oliy Majlis Qonunchilik palatasi deputati, “Yuksalish” umummilliy harakati raisi Akmal Burhonov bu murojaatga munosabat bildirib, o‘z takliflarini aytib o‘tdi.
— Bu muammo haqida qanchalik oshkora gapiradigan bo‘lsak, jamiyat shunchalik ushbu masala jiddiyligi va unga qarshi kurashish muhimligini anglab yetadi. Buning uchun esa oliy ta’lim tizimi jamoatchilik uchun imkon qadar ochiq bo‘lishini ta’minlash maqsadga muvofiq bo‘ladi.
Abituriyentlar va talabalar uchun eng muhim bo‘lgan jarayonlar – kirish imtihonlari va sinov imtihonlari bilan bog‘liq jarayonlarni o‘tkazishning aniq qoidalari bo‘lishi kerak. Imtihonlar, dissertatsiya ishlarining himoyasi barcha uchun ochiq va oshkora o‘tkazilishi zarur.
Oliy o‘quv yurtlari faoliyatiga doir muhim qarorlarning muhokamasi va qabul qilinishida talabalar uyushmalari va kengashlarining ishtirok etishi, shuningdek, tashkil qilinadigan turli komissiyalar ishiga talabalarning ham kiritilish vaqti keldi.
Talabalar va oliy o‘quv yurti rahbariyati o‘rtasida to‘g‘ridan-to‘g‘ri muloqot qilish imkoniyatini beruvchi mexanizmlar, masalan, universitet virtual qabulxonasini joriy etish kerak.
Qabul komissiyalari, appelyatsiya komissiyalari tarkibiga jamoatchilik va OAV vakillari ham kiritilsin. Diplom ishlari va dissertatsiyalar, opponentlarning taqrizlari keng ommaga e’lon qilib borilsa maqsadga muvofiq bo‘lardi. Bu amaliyot ayrim oliy o‘quv yurtlarida joriy qilingan.
OTMlarda korrupsion holatlar to‘g‘risida xabar berish imkoniyatini beruvchi ishonch telefonlarini ishga tushirish kerak.
Respublikadagi barcha OTM talabalari o‘rtasida korrupsiyaga nisbatan mutlaqo murosasiz munosabatni shakllantirishimiz kerak. Ko‘pchilik talabalar korrupsiya faktlari to‘g‘risida xabar berishni xohlamaydi va bu orqali korrupsionerlarni himoya qiladi yoki korrupsiyaning keng quloch yoyishiga ko‘maklashadi. Buning uchun esa talabalarning o‘zini o‘zi boshqarish institutlari, talabalarning mustaqil hamjamiyatlari institutini keng joriy qilish lozim bo‘ladi.
Izoh (0)