Бухоро вилояти ИИБ бошлиғи: Бирлашиб, ҳаракат қилсак, Бухоро ёшлари ўртасида жиноятчилик содир бўлмайди, деб ишонаман

Бухоро ёшлар марказида «Барчаси ўз қўлингда» декадаси доирасида Бухоро вилояти ИИБ бошлиғи, полковник Шуҳрат Алиев билан «Раҳбар ва ёшлар» учрашуви бўлиб ўтди.

Учрашувда 2019 йилнинг 6 ойида вояга етмаганлар томонидан содир этилган жиноятлар 38,09 фоизга камайган бўлса-да, Бухоро тумани, Жондор ва Шофиркон туманларида 100 фоизга, Ғиждувон туманида 150 фоизга ошгани қайд этилди.

— Бухорода 18–30 ёшдаги шахслар томонидан содир этилган жиноятлар 20,3 фоизга ҳамда уларда иштирок этган ёшлар 25 фоизга камайди. Бироқ бир вақтнинг ўзида айрим ҳудудларда ижобий натижага эришилмади. Айниқса, ёшлар томонидан содир этилган жиноятлар Ғиждувонда 5,5 фоизга, Қоровулбозорда 200 фоизга, Ромитанда 275 фоизга, шунингдек, йўл транспортида 900 фоизга кўпайди. Ёшлар томонидан содир этилган жиноятларнинг 20,55 фоизи ёки ҳар бешинчиси йўл-транспорт ҳодисаларини ташкил этади, — деди Шуҳрат Алиев. — Худди шу маънода, ҳайдовчилик соҳасида ўқиётган ёшларнинг дарсларга қатновини назоратдан ўтказганимизда, уларнинг дарсларга келмаётганининг гувоҳи бўлдик. Бундан ташқари, ёшларимиз ўртасида интернет билан боғлиқ жуда кўп нохуш ҳолатлар мавжуд. Ҳар қандай ҳолатдаям содир этилиши мумкин бўлган жиноятларнинг олдини олишимиз, мавжуд муаммони гапирмасдан, юзага келиши мумкин бўлган муаммони бартараф этиш ҳақида ўйлашимиз керак.

Вилоятда 60 та ҳайдовчилик гувоҳномаларига номзодларни тайёрловчи таълим муассасалари мавжуд. Ўтказилган ошкора ва ноошкора текширувларда таълим жараёнларига ўқувчиларнинг тўлиқ жалб қилинмаганлиги аниқланган. Жумладан, Вобкент туманидаги Мудофаага кўмаклашувчи ватанпарвар ташкилотида ташкил этилган ўқув-йиғинлар текширилганда, 5 та гуруҳга жалб қилинган 25 нафар ўқувчидан 9 нафари келмаган. Бухоро туманида эса бу кўрсаткичда 125 нафардан 63 нафар қайд этилган.

Ёшлар ўртасидаги жиноятчиликнинг олдини олиш бўйича жиноятчиликка мойиллиги бор 336 нафар ёш билан якка тартибда профилактик иш олиб борилган. 116 нафари ижтимоий-ҳуқуқий ёрдам кўрсатиш марказига жойлаштирилган. 12 нафари махсус ихтисослаштирилган ёпиқ турдаги касб-ҳунар коллежи ва мактаб-интернатга юборилган. 479 маротаба ўтказилган тунги рейдларда 37 та ҳуқуқбузарлик ҳолати аниқланган. Фарзанди тарбиясига салбий таъсир кўрсатган 212 нафар ота-она профилактик ҳисобга олинган.

Айни пайтда вилоятда 120 та «Фидокор ёшлар» патрул гуруҳларида 2244 нафар ҳарбий хизматни ўтаган, ИИБ ҳамда миллий гвардия тизимида ишлаш истагида бўлган ёшлар жалб қилинган.

«Раҳбар ва ёшлар» учрашувида «Фидокор ёшлар» патрул гуруҳи аъзоларига махсус хизмат кийимлари ва масканларда осойишталик ва хотиржамликни таъминлашда қўшган ҳиссаси учун ташаккурномалар топширилди.

— Ҳеч бир бола биз учун бегона эмас. Ҳар бири ўзимизнинг фарзандимиз. Уларнинг тарбиясига эса ҳаммамиз бир хилда масъулмиз. Бирлашиб, биргалашиб, ҳаракат қилсак, Бухоро ёшлари Республикада бирорта ҳам жиноят ҳуқуқбузарлик содир этмайди, деб ишонаман, — деди Шуҳрат Алиев.

Учрашув сўнгида «Тинчлик ортида» номли бадиий фильм намойиш этилди.