Ba’zida bitta film butun hayotga bo‘lgan qarashimizni o‘zgartirib yuborishi mumkin. Ayniqsa, u real voqealarga asoslangan bo‘lsa. Quyida reytingi 8 dan yuqori bo‘lgan va chuqur o‘ylashga da’vat etadigan kuchli ta’sirga ega filmlar haqida ma’lumot beramiz.
“Shindler ro‘yxati”
Agar tarixda Xolokost mavzusini shu qadar sinchkovlik bilan tasvirlab bergan rejissyor bo‘lsa, bu Stiven Spilberg bo‘lardi. “Shindler ro‘yxati” — uning faoliyatidagi asosiy asari hisoblanadi. Ikkinchi jahon urushi paytida deyarli 1 200 yahudiyni qutqarib qolgan nemis tadbirkori haqidagi film o‘sha yili barchani hayratda qoldirgan.
Kadrlarning aksariyati oq-qora rangda suratga olingan — bu esa tomoshabinga o‘tmishga nazar solish hissini beradi. Film atmosferasi yurakni ezadi, umidsizlik kayfiyatini taqdim etadi, biroq shu bilan birga, eng qora kunlarda ham ezgulik va jasorat bo‘lishi mumkinligini eslatadi.
Syujetga ko‘ra, nemis tadbirkori Oskar Shindler Xolokost paytida minglab polshalik yahudiylarni o‘limdan qutqaradi. Filmni yaratishga Shindler tomonidan qutqarilgan yahudiylardan biri Poldek Pfefferberg turtki bo‘lgan. Butun dunyoga uning qutqaruvchisi haqida gapirish istagi Poldek uchun qat’iy g‘oyaga aylangan.
1982-yilda Pfefferberg bilan ishlagan yozuvchi va ssenariy muallifi Tomas Kenali “Shindler kemasi” romanini chop etgan. Kitobni ko‘rib chiqqan rejissyor Stiven Spilberg syujetga qiziqib qolib, shundan so‘ng Universal Studios romanga film ishlash huquqini qo‘lga kiritgan. Ammo kartinani suratga olish faqat 10 yildan keyin boshlangan. Film shiori Talmuddan kelgan iqtibos bo‘lgan: “Kimki bitta hayotni saqlab qolsa, butun dunyoni qutqargan bo‘ladi”.
Mazkur drama dunyo bo‘ylab ko‘plab mukofotlarga loyiq deb topilgan. “Kinopoisk”da film reytingi — 8.8, IMDb’da esa deyarli rekord — 9 ballni to‘plagan.
“Tafakkur o‘yinlari”
Film buyuk matematik olim Jon Nesh hayotiga bag‘ishlangan. Syujetga ko‘ra, u bolaligidanoq raqamlar va hisob-kitoblar dunyosiga sho‘ng‘ib ketadi. Yillar o‘tib, yosh matematik Prinstondagi o‘qishini tugatadi va u yerda tadqiqot olib boradi. O‘qituvchilik qilib yurganida taqdir unga bo‘lajak rafiqasini ro‘baro‘ qiladi. Bir kuni Jon Markaziy razvedka boshqarmasida ishlashni taklif qilgan agent Parcher bilan tanishadi. U gazetalarda yashiringan Qo‘shma Shtatlar dushmanlarining shifrlangan xabarlarini izlashi kerak bo‘ladi. Nesh yangi ish bilan shug‘ullanar ekan, kimdir uni doimiy ravishda kuzatayotganidan shubhalana boshlaydi va keyinchalik hammani shubha ostiga oladi.
Film ssenariysi va yo‘nalishi shunday tuzilganki, tomoshabin dunyoga bosh qahramonning ko‘zi bilan qaraydi va dastlab haqiqat sifatida ko‘rsatilgan narsaga ishonish mumkinmi, deb hayron bo‘ladi. Mazkur loyiha 2002-yilda 4 ta “Oskar”ni, jumladan, “Eng yaxshi film” nominatsiyasini qo‘lga kiritgan.
“Kinopoisk” saytida ushbu filmga 8.5 ball berilgan. IMDb foydalanuvchilari esa uni 8.2 ball bilan baholagan.
“Qo‘lingdan kelsa tutib ol”
Rejissor Stiven Spilbergning Frenk Ebigneyl ismli firibgar hayoti asosida suratga olingan detektiv dramasi ham ko‘plab e’tirofga sazovor bo‘lgan.
Syujetga ko‘ra, Frenk Ebegneyl odamlar bilan tez til topishadigan, qizlar ko‘ngliga oson yo‘l topa oladigan yosh yigit bo‘ladi. Bundan tashqari, u o‘zi o‘ylab topgan yolg‘onlariga atrofdagilarni ishontirishga ham usta bo‘ladi. Bugun u advokat bo‘lishni ixtiyor etsa, ertaga uchuvchilar kiyimini kiyadi, keyingi kun esa u bemorlarni tekshiradi, hattoki ularga tashxis ham qo‘yadi.
Xushmuomala va madaniyatli Frenkning aslida firibgar ekani hech kimning xayoliga kelmaydi. Agar u FQB agenti Karl Xenrettining nazariga tushmaganida Frenkning kirdikorlari uzoq davom etar edi.
Bosh rollarni Leonardo Di Kaprio hamda Tom Xenks ijro etgan mazkur film reytingi “Kinopoisk”da — 8.5, IMDb’da — 8.1 ballni tashkil etadi.
Izoh (0)