Yoqutistondagi Lena daryosiga cho‘kib ketgan bolalarni qutqarmoqchi bo‘lib o‘zini suvga tashlagan to‘rt nafar erkakning jasadi topildi. Bu haqda Rossiya FVV matbuot xizmatiga tayanib, “Interfaks” xabar berdi.
“Jami yetti kishi halok bo‘ldi, ularning uch nafari bolakay”, — deyiladi xabarda.
Avvalroq, 11 kishi, jumladan, bolalar ham Lena daryosi qirg‘og‘ida dam olgani chiqqani haqida xabar berilgandi. Cho‘milish vaqtida bolalar odamlarni yordamga chaqirgan va to‘rt nafar erkak yordamga yugurib kelgan. Bolalarni qutqarishga uringan erkaklarning o‘zi suvga g‘arq bo‘lgan.
Ikki nafar bola suvdan chiqarib olingan, biroq ularni qutqarib qolishning imkoni bo‘lmagan. Uchinchi bolakayning jasadi esa keyinroq topilgan. Kechga borib qutqaruvchilar to‘rt nafar erkakning jasadini ham suvdan chiqarib olgan.
Yoqutiston tergov qo‘mitasi mazkur holat bo‘yicha tekshiruv ishlarini olib bormoqda.
Izoh (0)