Ёқутистондаги Лена дарёсига чўкиб кетган болаларни қутқармоқчи бўлиб ўзини сувга ташлаган тўрт нафар эркакнинг жасади топилди. Бу ҳақда Россия ФВВ матбуот хизматига таяниб, «Интерфакс» хабар берди.
«Жами етти киши ҳалок бўлди, уларнинг уч нафари болакай», — дейилади хабарда.
Аввалроқ, 11 киши, жумладан, болалар ҳам Лена дарёси қирғоғида дам олгани чиққани ҳақида хабар берилганди. Чўмилиш вақтида болалар одамларни ёрдамга чақирган ва тўрт нафар эркак ёрдамга югуриб келган. Болаларни қутқаришга уринган эркакларнинг ўзи сувга ғарқ бўлган.
Икки нафар бола сувдан чиқариб олинган, бироқ уларни қутқариб қолишнинг имкони бўлмаган. Учинчи болакайнинг жасади эса кейинроқ топилган. Кечга бориб қутқарувчилар тўрт нафар эркакнинг жасадини ҳам сувдан чиқариб олган.
Ёқутистон тергов қўмитаси мазкур ҳолат бўйича текширув ишларини олиб бормоқда.
Изоҳ (0)