Toshkent viloyati Yangiyo‘l shahrida “arzon” besh qavatli uylar qurish uchun ikki qavatli uylarni shoshma-shosharlik bilan buzishmoqda, deb xabar bermoqda “Gazeta.uz”.
Bloger Safari yozishicha, “mansabdorlar yangidan yangi qovunlarni tushirib charchashmayapti”. Bu safar e’tibor markaziga Yangiyo‘l tuman hokimi o‘rinbosari Alisher Usmonov tushgan.
“Gazeta.uz” maqolasida qayd etilishicha, jurnalistning “Yangiyo‘l shahridagi buzilishlar haqida nega uy egalariga qonuniy berilishi kerak bo‘lgan 6 oylik muddat inobatga olinmayapti va fuqarolar tezkorlik bilan ko‘chirilyapti?” — degan savoliga hokim o‘rinbosari: “Siz Prezidentning shahar ko‘rkini yaxshilash bo‘yicha qaroriga qarshimisiz?” — deya javob bergan.
“Bu har ikki gapning birida ‘siyosatga qarshimisan’ deydiganlar uslubidan bo‘lipti. Yo‘q, biz siyosatga ham, Prezident qaroriga ham qarshi emasmiz. Lekin siz 6 oylik qonuniy muddatni chetga surib, tezkor ravishda buzish ishlarini boshlab qo‘ygan holda Prezidentning boshqa so‘zlariga qarshi chiqmoqdasiz, o‘rtoq zamhokim, — deb yozadi bloger. — Shahar obodonlashtirilishi, chiroyli bo‘lishi yaxshi. Biroq bu aholining huquq va erkinliklari buzilishi hamda noroziligi evaziga bo‘lmasligi kerak”.
Izoh (0)