Qashqadaryo viloyat bolalar ko‘p tarmoqli tibbiyot markazining gematologiya sohasi bo‘yicha mutaxassislari Rossiyada malaka oshirib qaytgach, tibbiyotda avvallari davolash imkoni bo‘lmagan “o‘tkir leykoz” (oqqon) kasalligini zamonaviy davolash ishlari yo‘lga qo‘yilib, bemorlar qisqa vaqt ichida tekshiruvlardan o‘tkazilib, uzog‘i bilan 24 soat ichida aniq tashxis qo‘yilmoqda. Kimyoterapiya davolash muolajalari yo‘lga qo‘yilishi natijasida oqqon kasalligi ushbu markazning o‘zida davolanmoqda. Bu haqda “Daryo”ga shifokor Emin Bo‘ronov ma’lum qilmoqda.
Markazning laboratoriya bo‘yicha mutaxassislari ham Germaniya davlatida malaka oshirib qaytgach, yagona sitomorfologiya va sitoximiya usullari yo‘lga qo‘yilgan laboratoriya bo‘limi ishga tushirilgan. Natijada tibbiyotda kam uchraydigan va aniqlash qiyin bo‘lgan Goshe va Nimana-Pika kasalliklari aniqlandi. Ma’lum qilishlaricha, Goshe va Nimana-Pika kasalligi irsiy kasallik hisoblanib, avlod suradi.
— Qashqadaryo viloyat bolalar ko‘p tarmoqli tibbiyot markazi viloyatdagi 18 yoshgacha bo‘lgan bolalarga ixtisoslashgan malakali tibbiy yordam ko‘rsatishga mo‘ljallangan bo‘lib, investitsiya dasturiga asosan joriy yil 9 milliard so‘mga kapital ta’mirdan chiqarilib, jahon talablari darajasidagi tibbiy apparaturalar bilan jihozlandi, — deydi bosh shifokor, tibbiyot fanlari nomzodi Ixtiyor Karimov. — Markazimiz 465 o‘ringa mo‘ljallangan bo‘lib, nafaqat viloyatda, balki respublikada ham eng yirik tibbiy muassasalardan biri hisoblanadi. Hozirda markazda 17 ta davolash bo‘limi va 8 ta yordamchi bo‘lim hamda 250 qabul quvvatiga ega. Maslahat poliklinikasi faoliyat ko‘rsatmoqda. Yiliga 26 mingdan ortiq bemor bola statsionar davolanib chiqayotgan bo‘lsa, 100 mingdan ortiq bemor bolaga yuqori malakali statsionar va konsultativ tibbiy xizmat ko‘rsatilmoqda.
Markazda go‘daklarda uchraydigan va ko‘pincha o‘lim holatini keltirib chiqaradigan tug‘ma xastaliklar, masalan gastroshizis (chaqaloqning ichaklari, jigari, yuragi, o‘pkalari, buyragi va boshqa a’zolarining qorin bo‘shlig‘idan tashqari holatda tug‘ilishi), ichak tutilishi, diafragmal churra, qizilo‘ngach atreziyasi, girshprung kasalligi, gipospadiya yangi usulda deyarli asoratsiz operatsiya qilinmoqda. Natijada bemor bolalar orasida viloyatdan respublika markazlariga borib davolanish keskin kamaygan.
Ma’lum qilishlaricha, so‘nggi 2 yilda Sog‘liqni saqlash vazirligining tavsiyasiga binoan 10 nafar mutaxassis Germaniya, Rossiya va Turkiyaning tibbiyot markazlarida o‘z malakalarini oshirib, olgan bilim va ko‘nikmalarini amaliyotda tatbiq etmoqda.
Shuningdek, laparaskopik operatsiyalar o‘tkazilib, go‘dak va katta yoshdagi bolalarda izofluran yordamida ingalyatsiya narkoz orqali va peridural anesteziya operatsiyalari amalga oshirilmoqda. Yosh bolalarda ezofagastrafibroskopiya usulida yot jismlarni olish, kolonoskopiya tekshirish usullari o‘tkazilmoqda. Fibroendoskopiya tekshiruvlari 2018-yil 15-aprel kunidan buyon ishlamoqda. 2018-yil 11 oy davomida 300 nafar bemor bolalarda ezofagogastraduodenomik va kolonoskopik tekshiruvlar o‘tkazildi. Natijada hozirgi vaqtda yara kasalligi yosharganligi aniqlandi.
Izoh (0)