Қашқадарё вилоят болалар кўп тармоқли тиббиёт марказининг гематология соҳаси бўйича мутахассислари Россияда малака ошириб қайтгач, тиббиётда авваллари даволаш имкони бўлмаган «ўткир лейкоз» (оққон) касаллигини замонавий даволаш ишлари йўлга қўйилиб, беморлар қисқа вақт ичида текширувлардан ўтказилиб, узоғи билан 24 соат ичида аниқ ташхис қўйилмоқда. Кимётерапия даволаш муолажалари йўлга қўйилиши натижасида оққон касаллиги ушбу марказнинг ўзида даволанмоқда. Бу ҳақда «Дарё»га шифокор Эмин Бўронов маълум қилмоқда.
Марказнинг лаборатория бўйича мутахассислари ҳам Германия давлатида малака ошириб қайтгач, ягона ситоморфология ва ситохимия усуллари йўлга қўйилган лаборатория бўлими ишга туширилган. Натижада тиббиётда кам учрайдиган ва аниқлаш қийин бўлган Гоше ва Нимана-Пика касалликлари аниқланди. Маълум қилишларича, Гоше ва Нимана-Пика касаллиги ирсий касаллик ҳисобланиб, авлод суради.
— Қашқадарё вилоят болалар кўп тармоқли тиббиёт маркази вилоятдаги 18 ёшгача бўлган болаларга ихтисослашган малакали тиббий ёрдам кўрсатишга мўлжалланган бўлиб, инвестиция дастурига асосан жорий йил 9 миллиард сўмга капитал таъмирдан чиқарилиб, жаҳон талаблари даражасидаги тиббий аппаратуралар билан жиҳозланди, — дейди бош шифокор, тиббиёт фанлари номзоди Ихтиёр Каримов. — Марказимиз 465 ўринга мўлжалланган бўлиб, нафақат вилоятда, балки республикада ҳам энг йирик тиббий муассасалардан бири ҳисобланади. Ҳозирда марказда 17 та даволаш бўлими ва 8 та ёрдамчи бўлим ҳамда 250 қабул қувватига эга. Маслаҳат поликлиникаси фаолият кўрсатмоқда. Йилига 26 мингдан ортиқ бемор бола стационар даволаниб чиқаётган бўлса, 100 мингдан ортиқ бемор болага юқори малакали стационар ва консултатив тиббий хизмат кўрсатилмоқда.
Марказда гўдакларда учрайдиган ва кўпинча ўлим ҳолатини келтириб чиқарадиган туғма хасталиклар, масалан гастрошизис (чақалоқнинг ичаклари, жигари, юраги, ўпкалари, буйраги ва бошқа аъзоларининг қорин бўшлиғидан ташқари ҳолатда туғилиши), ичак тутилиши, диафрагмал чурра, қизилўнгач атрезияси, гиршпрунг касаллиги, гипоспадия янги усулда деярли асоратсиз операция қилинмоқда. Натижада бемор болалар орасида вилоятдан республика марказларига бориб даволаниш кескин камайган.
Маълум қилишларича, сўнгги 2 йилда Соғлиқни сақлаш вазирлигининг тавсиясига биноан 10 нафар мутахассис Германия, Россия ва Туркиянинг тиббиёт марказларида ўз малакаларини ошириб, олган билим ва кўникмаларини амалиётда татбиқ этмоқда.
Шунингдек, лапараскопик операциялар ўтказилиб, гўдак ва катта ёшдаги болаларда изофлуран ёрдамида ингаляция наркоз орқали ва перидурал анестезия операциялари амалга оширилмоқда. Ёш болаларда эзофагастрафиброскопия усулида ёт жисмларни олиш, колоноскопия текшириш усуллари ўтказилмоқда. Фиброэндоскопия текширувлари 2018 йил 15 апрель кунидан буён ишламоқда. 2018 йил 11 ой давомида 300 нафар бемор болаларда эзофагогастрадуоденомик ва колоноскопик текширувлар ўтказилди. Натижада ҳозирги вақтда яра касаллиги ёшарганлиги аниқланди.
Изоҳ (0)