“Daryo” tahririyatiga murojaat qilgan qashqadaryolik Gulnoza Boboqulova bir necha oydan buyon o‘z mablag‘lari hisobidan kitob do‘koni qurish ishtiyoqida yelib-yugurayotganini, ammo Qarshi tuman hokimligi ushbu tashabbusga munosib javob bermayotganidan shikoyat qilmoqda.
Gulnoza Boboqulova murojaati bo‘yicha voqea tafsilotlarni o‘rgangan “Daryo” muxbirining yozishicha, asosiy muammo kitob do‘koni uchun ko‘rsatilgan joylarning tadbirkorga ma’qul kelmayotganida.
— Bilasizmi, bizning Qarshi tumani Dasht qishlog‘i hududimizda mening hisob-kitobimga ko‘ra, 400 dan ortiq spirtli ichimliklar sotadigan savdo do‘koni mavjud, — deydi Gulnoza Boboqulova. — Ammo birorta ham kitob do‘koni yo‘q. Mana shu bo‘shliqni to‘ldirish maqsadida, hududimizda o‘z mablag‘im hisobidan kitob do‘koni va yoshlarning kitob mutolaasi uchun o‘quv zali qurish niyatini bildirganman. Biroq, shu maqsad yo‘lida necha oydirki, sarsonman.
Asl kasbi o‘qituvchi bo‘lgan tadbirkor Gulnoza Boboqulova kitob do‘koni va o‘quv zali qurish uchun 50–60 million so‘m mablag‘ni hech qanday daromadni ko‘zlamagan holda sarf qilishni maqsad qilgan.
— Dasht qishlog‘i markazida o‘quv markazimiz faoliyat yuritadi, — deydi Gulnoza Boboqulova. – O‘quv markazda 40–50 nafar o‘quvchi tahsil oladi. Bundan tashqari o‘quv markazimiz qoshida imkoniyatdan kelib chiqqan holda butkada kitob do‘koni tashkil etganmiz. O‘quvchilarimizning ko‘cha-ko‘yda, daraxt tagida kitob o‘qiyotganini ko‘rib, dilim ranjiydi. Nega endi, shu yoshlarimiz uchun bittagina o‘quv zali qurish imkoni bo‘lmasa?
Ma’lum bo‘lishicha, Gulnoza Boboqulova rahbarligidagi o‘quv markazi tadbirkor Dildora Shoyqulova faoliyat yuritayotgan savdo do‘koni bilan yonma-yon joylashgan. Dildora Shoyqulova Gulnoza Boboqulovaga tegishli o‘quv markazi qarshisidagi yer maydonida tuman hokimligining ruxsatnomasi bilan yengil tipdagi oilaviy korxona qurib, milliy shirinliklar ishlab chiqarishni maqsad qilgan. Muammo shundaki, Gulnoza Boboqulova ham ayni shu joyga kitob do‘koni va o‘quv zali qurish niyatini bildirgan. Bu haqda tuman hokimi G‘ayrat Begaliyevga ham ma’lum qilgan.
— Qurilish ishlarini boshlash uchun birgina ruxsatnoma kifoya qiladigan bo‘lsa, bunday ruxsatnoma tuman hokimi tomonidan bizga ham berilgandi, — deydi Gulnoza Boboqulova. – Ammo o‘sha payt Dildora Shoyqulova bunga qarshilik ko‘rsatgani uchun qurilish ishlarini boshlamagandik. Buni qarangki, xuddi shunday ruxsatnoma bilan endilikda savdo do‘koni qurilishi boshlab yuborildi. Tuman hokimiga bu haqda aytsam, tuman arxitektura va qurilish boshqarmasi boshlig‘i Jasur G‘aniyevga holat bilan tanishib, noqonuniy qurilishni to‘xtatish xususida topshiriq berdi. Oqibatda noqonuniy qurilish ishlarini boshlagan tadbirkorga qurilishni to‘xtatishi xususida aytishdi.
17 yildan beri ushbu hududda savdo qilib kelayotgan tadbirkor Dildora Shoyqulovaning aytishicha, tortishuvlarga sabab bo‘layotgan yerdan, yengil tipdagi oilaviy korxona tashkil etish uchun qurilish ishlarini boshlashga tuman hokimligi tomonidan ruxsat berilgan.
Dildora Shoyqulova “Daryo” muxbirining “ushbu hududdan qurilish ishlarini boshlashingiz uchun tuman hokimining qarori bormi?” degan savoliga javoban tuman hokimi G‘ayrat Begaliyev imzosi bilan taqdim etilgan ruxsatnomani ko‘rsatdi. Dildora Shoyqulovaning ta’kidlashicha, yengil tipdagi qurilish ishlarini boshlash uchun tuman hokimligi tomonidan qaror emas, xuddi shunday ruxsatnoma taqdim etiladi. Shunga ko‘ra, Dildora Shoyqulova yengil tipdagi qurilishini boshlab yuborgan, 60–40 sm hajmdagi beton fundament bitgan.
Dildora Shoyqulova yengil tipdagi qurilishining fundamentini 60–40 sm hajmda bo‘lgani bu yengil tipdagi qurilish me’yoridan chiqib ketish hisoblanishini, ammo yomg‘irli kunlarda do‘konga zarar yetmasligi uchun shunday baland qurishga majbur bo‘lganini ta’kidlamoqda.
Tuman arxitektura va qurilish boshqarmasi boshlig‘i Jasur G‘aniyevning ma’lumot berishicha, Dildora Shoyqulovaga yengil tipdagi qurilish uchun tuman hokimligi tomonidan taqdim etilgan ruxsatnoma avvalroq Gulnoza Boboqulovaga ham berilgan, ammo o‘sha ruxsatnoma endilikda o‘z kuchini yo‘qotgan. Jasur G‘aniyevga ko‘ra, ayni paytda Dildora Shoyqulovaning xatti-harakati qonuniy.
Shuningdek, Jasur G‘aniyev tuman hokimligi tomonidan tadbirkor Gulnoza Boboqulovaga qishloq markazidagi maktab va bog‘cha yonidan kitob do‘koni va o‘quv zali qurish uchun yer ajratib berilishi mumkinligi aytilganini, biroq Gulnoza Boboqulova bu taklifni rad etganini ta’kidlamoqda.
Qarshi tuman hokimi o‘rinbosari G‘ayrat Ergashevning aytishicha, tuman hokimligi kitob do‘koni qurish tashabbusi bilan chiqqan har bir tadbirkorni qo‘llab-quvvatlaydi. Xohlagan hududidan yer maydoni ajratib beradi.
Gulnoza Boboqulova maktab va bog‘cha joylashgan hudud rahbarligidagi o‘quv markaziga teskari hudud bo‘lgani bois, o‘quvchilarining kitob do‘koniga borib kelishida qiyinchilik tug‘dirishini aytib, maktab va bog‘cha joylashgan hududdan kitob do‘koni qurish taklifini rad etganini bildirdi.
— Menga faqat shu hudud qulay, shu yerdan joy berishlarini xohlayman, — deydi Gulnoza Boboqulova.
Tuman arxitektura va qurilish boshqarmasi boshlig‘i Jasur G‘aniyevning “Daryo” muxbiriga qo‘shimcha qilishicha, Gulnoza Boboqulovaning Dasht qishlog‘idagi o‘quv markazi joylashgan hududdan 100 metr narida ham 6 sotix yer berilgan. Gulnoza Boboqulova esa aytilayotgan 6 sotix yer hunarmand ayollar uchun o‘quv markazi tashkil etish uchun berilganini iddao qilmoqda.
Ma’lum qilishlaricha, 241 723 nafar aholi istiqomat qiluvchi Qarshi tumanida ayni kunda atigi 5 ta kitob do‘koni mavjud.
Maqolamiz so‘ngida, qishloq yoshlari uchun kitob do‘koni quraman, ularning ma’naviyatini yuksaltiraman deyotgan o‘qituvchi-tadbirkorning tashabbusi olqishga sazovor ekanligini ta’kidlab, kitob do‘koni va o‘quv zali uchun maktab va bog‘cha joylashgan hudud eng maqbul variant ekanligini ham ta’kidlab o‘tmoqchimiz. Zero kitob do‘koni qurib, yoshlarga ma’naviyat ulashishni niyat qilgan oliyhimmat kishi uchun muhimi, kitoblarining o‘qilishi. Bundan ortiq maqsad ko‘zlanmagan bo‘lsa, albatta.
Izoh (0)