Namangan tumani markazi Toshbuloq shaharchasida amalga oshirilgan qurilish, ta’mirlash va obodonlashtirish ishlari natijasida yangi baro etilgan hamda qaytadan qurilgan 209 ob’ekt bir kunda foydalanishga topshirildi. Bu haqda “Daryo”ga Namangan viloyati hokimligi axborot xizmati xabar berdi.
“Obod markaz” dasturi doirasida joriy yil may-iyun oylarida Toshbuloqda olib borilgan keng ko‘lamli ishlar natijasida tuman markazi obod va ko‘rkam, aholi uchun barcha shart-sharoit va imkoniyatlar yaratilgan hududga aylandi.
Tuman markazini zamonaviy shaharga aylantirish bo‘yicha tuzilgan rejaga asosan 209 ta obyektda jami qiymati 102,0 milliard so‘m bo‘lgan qurilish va ta’mirlash ishlari olib borilishi ko‘zda tutilgandi. Bunda “Obod markaz” dasturi doirasida 36,4 milliard so‘m ajratilgan bo‘lsa, qolgan qismi viloyat va tuman byudjet mablag‘lari, mahalliy korxonalar mablag‘lari, bank kreditlari hamda tadbirkorlarning o‘z mablag‘lari hisobidan moliyalashtirilishi ko‘zda tutilgandi. Amalda bu ko‘rsatkich 112,0 milliard so‘mga yoki rejaga nisbatan 109 foizga bajarildi.
Tuman markazidagi Madaniyat saroyi kapital ta’mirlanib, zamonaviy majlislar zaliga ega bo‘ldi, Xotira maydoni barpo etildi va “Motamsaro ona” haykali o‘rnatildi. Davlat xizmatlari markazi binosi, “Baxt uyi”, Xalq qabulxonasi, soliq inspeksiyasi, DSENM, IIB, Mudofaa, Favqulodda vaziyatlar, Bandlik bo‘limlari, markaziy dorixona va kutubxona binosi, tibbiyot birlashmasining terapiya bo‘limi katta qurilish-ta’mirlash ishlari amalga oshirilib, yakuniga yetkazildi.
Toshbuloq markaziy ko‘chalari kengaytirilib, asfaltlandi, yo‘l chetidagi beton ariqlar yangilanib, piyodalar yo‘lakchalari qurildi. Har ikki yonga tungi yoritgichlar o‘rnatildi, yashil maysazorlar tashkil qilinib, daraxt ko‘chatlari va gullar ekildi.
Tuman markazida bank kredit mablag‘lari hisobidan 2 ta 2-3 xonali namunaviy ko‘p qavatli uylar qurilib, xonadonlardan 36 tasi kam ta’minlangan va nogironligi bo‘lgan fuqarolarga berildi.
Aholi uchun qulaylik yaratish, sog‘lom turmush tarzini targ‘ib qilish maqsadida 5 ta bolalar maydonchasi barpo etildi, tuman markazidagi futbol maydoni ta’mirlandi.
Hududda uzoq yillardan beri og‘riqli masala bo‘lib kelayotgan kanalizatsiya, ichimlik suvi, elektr energiyasi, tabiiy gaz tarmoqlarini ta’mirlash hamda yangilarini barpo etish masalasiga jiddiy yondashildi. Iste’molchilarning elektr energiya ta’minotini tubdan yaxshilash uchun yangi temir beton tayanchlar o‘rnatilib, qo‘shimcha elektr uzatish tarmog‘i qurildi, yangi transformator punktlari o‘rnatildi.
Namangan tumani markazining suv ta’minotini yaxshilash, aholiga toza ichimlik suvi yetkazib berishni tashkil etish bo‘yicha Janish suv olish inshootidan olib kelinayotgan suv tarmog‘i uchun 9,6 milliard so‘m mablag‘ ajratilib, tarmoq tortish ishlari yakuniga yetmoqda. Tuman markazida ko‘p kilometrlik ichimlik suv quvurlari tortildi, kanalizatsiya tizimi tozalanib, qayta ishga tushirildi.
Dastur ijrosi doirasida Toshbuloqda 105 ta zamonaviy savdo va xizmat ko‘rsatish majmuasi va ishlab chiqarish obyekti ham barpo etildi.
Izoh (0)