Saylanayotgan mahalla raislarining qanday odamligini oldindan bilib bo‘lmaydi, mahalla raislari orasida uchrayotgan illatlarni esa jamiyatning boshqa bo‘g‘inlarida ham uchratish mumkin. Bu haqda Fuqarolarning o‘zini-o‘zi boshqarish organlari faoliyatini muvofiqlashtirish bo‘yicha Respublika kengashi boshqaruv raisi Shavkat Javlonov 9-iyul kuni jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Muloqot davomida mahalla raislari orasida turli huquqbuzarlik va hatto jinoyatchilik holatlari qayd etilayotgani, bunga kengash rahbariyatining munosabati qanday ekanligi haqida savol berildi.
“Mahallaga bosh qilib saylangan raislarimizning hammasida ham kriminal holatlar bo‘lmaydi, deb kafolat berolmayman. Chunki bu yerda inson omili bor. Mahalla raisligiga nomzodning dasturi bilan tanishsangiz, xalqni ishontirishi, ko‘rinishi va gap-so‘zini kuzatsangiz — tuppa-tuzuk odam. Ma’lum vaqt o‘tgach esa unda ham har xil illatlar paydo bo‘lib qoladi”, — dedi Javlonov.
Uning qo‘shimcha qilishicha, bu kabi illatlar faqat mahalla tizimida emas, boshqa sohalarda ham kuzatilmoqda.
“Bu narsa faqat mahalla tizimida bo‘lyapti, desak adolatsizlik bo‘ladi. Bu bilan o‘zimizni oqlab, boshqalarni qoralamoqchi emasman. Lekin bu jamiyatimizning illati. Shifokorlarda, o‘qituvchilarda, maktabgacha ta’limda yoki huquqni muhofaza qiluvchi idoralarning o‘zida — yuqori bo‘g‘inidan tortib, pastki tizimigacha shunday illat yo‘qmi? Xudoga shukrki, bu illat butun jamiyatimizni qamrab olmagan”, — dedi Javlonov.
Qayd etishlaricha, 2018-yil mahalla raislarini jinoiy javobgarlikka tortish bilan bog‘liq 21 holat qayd etilgan.
Izoh (0)