Gulnora Karimovaga tegishli Parijdagi kvartira, Sen-Tropedagi villa hamda Parij yaqinidagi qasrning sotuvidan tushgan pullar O‘zbekistonga beriladi, deb xabar qildi “NUZ.uz”.
Gulnora Karimovaga tegishli ko‘chmas mulklar Société civile immobilière — “ko‘chmas mulkni boshqaruvchi kompaniya” nomiga rasmiylashtirilgan bo‘lgan. Tergov vaqtida uy-joylar xorij telekommunikatsiya kompaniyalarining O‘zbekiston bozoriga kirishi uchun olingan “korrupsiya” pullari evaziga qurilgani aniqlangan.
Fransiya OAV Gulnora Karimovaga tegishli Parijdagi kvartirani 31 million yevroga baholamoqda, villa esa — 2,4 million yevro, Versal yaqinidagi de Grusse qasri esa 28 million yevro turadi. Biroq O‘zbekiston tomoni oladigan summa sezilarli darajada kam. Xususan, kvartira joriy yilning bahorida kimoshdi savdolari orqali 14 million yevroga sotib yuborilgan. Bungan tashqari 2 million yevro tergov uchun sarflangan xarajatlar kompensatsiyasi uchun olib qolinadi.
Fransiya milliy moliya prokuraturasining prokurori Nikolya Bayetoning aytishicha, Karimovaga tegishli ko‘chmas mulk borasidagi kelishuvga erishish uchun bir yarim yil vaqt ketgan. Bunda pullarni qaytarish uchun to‘g‘ri yuridik yo‘lni tanlash asosiy muammo bo‘lgan. Bayeto sud tergovchisi Serj Turner bilan Toshkentga kelganidan so‘ng, bunga yechim topilgan.
O‘zbekistonda chiqarilgan sud qarorini tan olishning murakkab yo‘lidan voz kechishga qaror qilingan. Davlat o‘zini Fransiyada jabrlanuvchi deb e’lon qilgan va fuqaroviy da’vogar statusini qo‘lga kiritgan.
26-iyun kuni SCI vakili “aybni tan olish borasidagi kelishuvni” rasmiylashtirgan, 9-iyul kuni esa mazkur jarayonga oid apellatsiya muddati chiqdi. Endilikda ushbu uchta ko‘chmas mulk obyektlari rasman musodara qilingan hisoblanadi. Ular tovon sifatida boshqa bir xorij davlatiga berila olmasligi sabab, O‘zbekiston ularni sotishdan tushgan pullarni oladi. Savdolarni Fransiyaning olib qo‘yilgan va musodara qilingan avkivlarni qaytarish bilan shug‘ullanuvchi agentligi nazorat qiladi.
Izoh (0)