Qashqadaryoda 2019-yil 3 585 ta fermer xo‘jaligi 500 ming tonna g‘alla sotib, viloyat rejasini ortig‘i bilan bajardi. Bu haqda “Daryo”ga viloyat hokimligi matbuot xizmati rahbari Bekzod Mamatqulov xabar bermoqda.
Viloyatdagi mavjud 3 585 ta fermer xo‘jaligi joriy yil 204 800 gektar yerga g‘alla ekkan. Shundan 141 800 gektar suvli va 63 000 gektar lalmi maydonlardan davlatga 500 ming tonna g‘alla sotildi. Ayni kunga qadar Koson, Mirishkor, Nishon, Qarshi, Kasbi, G‘uzor va Muborak tumanlari davlatga g‘alla topshirish rejasini bajarib, yuqori ko‘rsatkichga erishdi.
Ma’lum bo‘lishicha, Vazirlar Mahkamasining 2019-yil 26-apreldagi qarori bilan tasdiqlangan Nizom talablariga ko‘ra viloyatda 470 ta “G‘alla o‘rish otryad”lari shakllantirilgan bo‘lib, otryadlarga 3 760 nafar mas’ul biriktirilgan.
O‘rimda qatnashadigan kombaynlarning 940 nafar operatorlarini mavsum oldidan moddiy rag‘batlantirish maqsadida bosh operatorga 1 million, yordamchi mexanizatorga 800 ming so‘mdan mukofot to‘langan. Shuningdek har bir mexanizatorga 1 qop un, 1 qop piyoz, 1 qop kartoshka, 1 qop sabzi, 10 kg guruch, 10 kg go‘sht, 10 kilogrammdan yog‘ tarqatilgan.
— G‘alla o‘rimi mavsumi oldidan jami 400 dona, shundan 168 dona “Keys” va “Nyu-xolland”, 190 dona “Klaas” va 42 dona “Vektor” kombaynlar to‘liq ta’mirlanib, mavsumga tayyorlandi, —deydi Bekzod Mamatqulov. — Grafik asosida kombaynlarni texnik ko‘rikdan o‘tkazib, sinab ko‘rish maqsadida yurgizib ko‘rildi. Hukumatimiz yordami bilan 2019-yilda ham g‘alla o‘rim-yig‘im mavsumi uchun yangidan 70 dona g‘alla o‘rish kombaynlari sotib olindi.
Izoh (0)