O‘simliklar karantini davlat inspeksiyasi vakillari 4-iyul kuni jurnalistlar bilan bo‘lib o‘tgan ochiq muloqotda 2019-yil iyun oyida O‘zbekistondan Boshqirdistonga olib borilgan atirgul ko‘chatlarida aniqlangan karatindagi zaharli bukri pashsha bo‘yicha izoh berdi.
2019-yilning 27-iyun kuni O‘zbekistondan Boshqirdistonga olib borilgan atirgul ko‘chatlarida karatindagi zaharli bukri pashsha aniqlangani xabar qilingan edi. Ma’lumotda qayd etilishicha, Ufa xalqaro aeroportida mutasaddilar buni payqab qolishgan va gul ko‘chatlarini yo‘q qilishgan. Pashsha Boshqirdiston hududiga kirishga ulgurmagan.
Axborot va ommaviy kommunikatsiyalar agentligida o‘tgan anjumanda “Daryo” muxbiri Musulmonbek Ibrohimov zaharli bukri pashsha aniqlangan atirgul ko‘chatlari O‘zbekistondan qanday tartibda tekshiruvdan o‘tgani va eksportga chiqib ketgani haqida savol berdi.
O‘simliklar karantini davlat inspeksiyasi rahbari Ibrohim Ergashevning aytishicha, tarqalgan xabarga oydinlik kiritish uchun O‘zbekiston hukumati Rossiya mutasaddilaridan batafsil ma’lumot taqdim etishlarini so‘rab murojaat yo‘llagan.
“O‘zbekistondan Ufa shahriga eksport bo‘lgan atirguldan bukri pashsha chiqanligi bo‘yicha Rosselxoznadzor tashkilotidan aniq va batafsil ma’lumot berishini so‘rab, murojaat yubordik. Ular to‘liq ma’lumot taqdim etganidan keyin ushbu masalani o‘rnatilgan tartibda ko‘rib chiqamiz. Hozirda O‘zbekistonda yetishtirlayotgan gullarning sifatini qayta ko‘rib chiqish bo‘yicha texnazorat olib bormoqdamiz”, — dedi Ibrohim Ergashev
Inspeksiyasi rahbarining ta’kidlashicha, O‘zbekiston hududidan chiqib ketayotgan atirgullarda bukri pashsha aniqlanmagan. Agar aniqlangan taqdirda eksportga ruxsat berilmay, o‘sha joyning o‘zida yo‘q qilinadi.“O‘zbekistondan chiqib ketayotgan gullarda bukri pashsha borligi aniqlanmagan. Agar aniqlangan taqdirda, mahsulotga fitosanitariya sertifikati rasmiylashtirilmaydi. Bu holatda, imkoni bo‘lsa, mahsulot tozalanib, eksportga chiqariladi yoki joyida yo‘q qilinadi. Shu bilan birga, zaharli pashsha aniqlangan taqdirda, gul ko‘chati qaysi joyda yuklangani aniqlanadi. Bukri pashsha bor hudud karantin deb e’lon qilinib, fitosanitariya chora-tadbirlari amalga oshiriladi”, — dedi Ergashev
O‘simliklar karantini davlat inspeksiyasi boshqarma boshlig‘i Dilshod Anorboyev ushbu masalaga to‘xtalarkan, dastlabki surishturuvlar natijasiga ko‘ra, atirgullar O‘zbekistondan bormagan bo‘lishi mumkinligini taxmin qildi.
“Toshkent xalqaro aeroportidan Moskva orqali Ufa shahriga haftasiga to‘rtta reys qatnovi yo‘lga qo‘yilgan. Tarqalgan ma’lumotga ko‘ra, atirgullarda zaharli bukri pashsha borligi 27-iyun kuni Rossiya inspektorlari tomonidan Ufa shahrida qayd etilgan. Dastlabki surishtiruvlarda oxirgi bir haftada ya’ni 20—27-iyun kunlari Toshkent xalqaro aeroportidan bironta ham atirgul Ufa yo‘nalishi bo‘yicha yuklanmagani aniqlandi. Xalqaro reyslarni o‘rganganimizda Ufa shahriga Moskva orqali Qozog‘iston, Hindiston, Gollandiya va Vengriya davlatlaridan ham tranzit reyslar borligi ma’lum bo‘ldi. Lekin, bukri pashsha chiqqan atirgullar boshqa davlatlardan keltirilgan degan fikrdan yiroqmiz. Bu hozircha dastlabki surishtiruv natijasi, xolos. O‘zbekistondagi barcha hududiy inspeksiyalarga rasmiy topshiriq orqali o‘rganganimizda bukri pashsha hashorati hududimizda qayd etilmadi. Aslida bukri pashsha ko‘proq Rossiya va boshqa davlatlarda tarqalgan”, — dedi Dilshod Anorboyev.
O‘simliklar karantini davlat inspeksiyasi vakillarining qo‘shimcha qilishicha, Rossiya hukumatidan ma’lumot olinganidan so‘ng, ichki surishtiruv-nazorat ishlarini oxiriga yetkazib, ommaga bu masala bo‘ycha alohida ma’lumot taqdim etiladi.
Izoh (0)