Qoraqalpog‘istondagi yangi Jel koni 6,4 mlrd kubometr gaz beradi

Shavkat Mirziyoyev O‘zbekiston va “Gazprom EP International B.V.” o‘rtasida mahsulot taqsimotiga oid bitimni ma’qulladi, deb xabar beradi Norma.

2006—2009-yillarda Ustyurt mintaqasida geologiya-qidiruv ishlari olib borilib, “Gazprom” OAJning 371 million AQSh dollari miqdorida to‘g‘ridan to‘g‘ri investipiyalari o‘zlashtirilgan. Rossiya kompaniyasi Ustyurt mintaqasidagi Shaxpaxta investitsion blokida amalga oshirilgan qidirish va razvedka qilish ishlari natijasida sanoat toifasidagi umumiy tabiiy gaz zaxirasi 6,4 milliard metr kub va gaz kondensati zaxirasi 76 ming tonnaga teng yangi Jel konini ochdi.

Ma’qullangan mahsulot taqsimotiga oid bitim ushbu konga nisbatan quyidagilarni nazarda tutadi:

• kompensatsiya mahsulotining cheklangan darajasi – 75%;
• foyda solig‘ining stavkasi – 12%;
• investorning qoplanishi shart bo‘lgan xarajatlarining qoplanmagan qismi uchun yillik moliyalashtirish stavkasi – 8%;
• tabiiy gazning narx kon’yunkturasi o‘zgarganda tabiiy gaz uchun yer qa’ridan foydalanganlik uchun soliq (royalti)ni qo‘llash — 1 ming kub metr uchun narx $125 dan past bo‘lganda 0% dan narx $170 dan ortiq bo‘lganda 30% gacha diapazonda;
• investorning geologiya-qidiruv ishlarini olib borishda qilgan tarixiy sarf-xarajatlarini qoplash (mustaqil audit o‘tkazish natijalariga ko‘ra);
• TIAni ishlab chiqishda va investorning ichki daromadlilik normasi (IRR) saqlanishini ta’minlashda foydaga qolgan mahsulotni tenglik asosida taqsimlashni nazarda tutgan xolda bitimning ayrim texnik-iqtisodiy parametrlarini qayta ko‘rib chiqish;
• investor tomonidan o‘z huquq va majburiyatlarini uning “Gazprom zarubejneftegaz” AJ sho‘ba kompaniyasiga topshirish imkoniyati hamda vakolatli organ funksiyasini bizning tomondan Energetika vazirligiga o‘tkazish.

Soliqqa tortish, shu jumladan, bojxona to‘lovlarini to‘lash tartibi bitimning butun amal qilish davrida o‘z kuchini saqlab qoladi. Shuningdek, milliy qonunchilik (ishlarni xavfsiz olib borish, mehnat, yer osti boyliklari, atrof-muhit va fuqarolarning sog‘ligini muhofaza qilish bo‘yicha normalar bundan mustasno) o‘zgargan taqdirda imzolangan hujjat shartlari ustuvorlikka ega. Investorning barcha imtiyoz va preferensiyalari operatorga tatbiq etiladi. “O‘zbekneftgaz” AJning bitim doirasida investorga beriladigan mol-mulki va obyektlariga mol-mulk solig‘i solinmaydi.

Ichki bozorda realizatsiya qilinadigan neft-gaz mahsulotlari narxiga chegirma qo‘llanadi.