Ўсимликлар карантини давлат инспекцияси вакиллари 4 июль куни журналистлар билан бўлиб ўтган очиқ мулоқотда 2019 йил июнь ойида Ўзбекистондан Бошқирдистонга олиб борилган атиргул кўчатларида аниқланган каратиндаги заҳарли букри пашша бўйича изоҳ берди.
2019 йилнинг 27 июнь куни Ўзбекистондан Бошқирдистонга олиб борилган атиргул кўчатларида каратиндаги заҳарли букри пашша аниқлангани хабар қилинган эди. Маълумотда қайд этилишича, Уфа халқаро аэропортида мутасаддилар буни пайқаб қолишган ва гул кўчатларини йўқ қилишган. Пашша Бошқирдистон ҳудудига киришга улгурмаган.
Ахборот ва оммавий коммуникациялар агентлигида ўтган анжуманда «Дарё» мухбири Мусулмонбек Иброҳимов заҳарли букри пашша аниқланган атиргул кўчатлари Ўзбекистондан қандай тартибда текширувдан ўтгани ва экспортга чиқиб кетгани ҳақида савол берди.
Ўсимликлар карантини давлат инспекцияси раҳбари Иброҳим Эргашевнинг айтишича, тарқалган хабарга ойдинлик киритиш учун Ўзбекистон ҳукумати Россия мутасаддиларидан батафсил маълумот тақдим этишларини сўраб мурожаат йўллаган.
«Ўзбекистондан Уфа шаҳрига экспорт бўлган атиргулдан букри пашша чиқанлиги бўйича Россельхознадзор ташкилотидан аниқ ва батафсил маълумот беришини сўраб, мурожаат юбордик. Улар тўлиқ маълумот тақдим этганидан кейин ушбу масалани ўрнатилган тартибда кўриб чиқамиз. Ҳозирда Ўзбекистонда етиштирлаётган гулларнинг сифатини қайта кўриб чиқиш бўйича техназорат олиб бормоқдамиз», — деди Иброҳим Эргашев
Инспекцияси раҳбарининг таъкидлашича, Ўзбекистон ҳудудидан чиқиб кетаётган атиргулларда букри пашша аниқланмаган. Агар аниқланган тақдирда экспортга рухсат берилмай, ўша жойнинг ўзида йўқ қилинади.«Ўзбекистондан чиқиб кетаётган гулларда букри пашша борлиги аниқланмаган. Агар аниқланган тақдирда, маҳсулотга фитосанитария сертификати расмийлаштирилмайди. Бу ҳолатда, имкони бўлса, маҳсулот тозаланиб, экспортга чиқарилади ёки жойида йўқ қилинади. Шу билан бирга, заҳарли пашша аниқланган тақдирда, гул кўчати қайси жойда юклангани аниқланади. Букри пашша бор ҳудуд карантин деб эълон қилиниб, фитосанитария чора-тадбирлари амалга оширилади», — деди Эргашев
Ўсимликлар карантини давлат инспекцияси бошқарма бошлиғи Дилшод Анорбоев ушбу масалага тўхталаркан, дастлабки суриштурувлар натижасига кўра, атиргуллар Ўзбекистондан бормаган бўлиши мумкинлигини тахмин қилди.
«Тошкент халқаро аэропортидан Москва орқали Уфа шаҳрига ҳафтасига тўртта рейс қатнови йўлга қўйилган. Тарқалган маълумотга кўра, атиргулларда заҳарли букри пашша борлиги 27 июнь куни Россия инспекторлари томонидан Уфа шаҳрида қайд этилган. Дастлабки суриштирувларда охирги бир ҳафтада яъни 20—27 июнь кунлари Тошкент халқаро аэропортидан биронта ҳам атиргул Уфа йўналиши бўйича юкланмагани аниқланди. Халқаро рейсларни ўрганганимизда Уфа шаҳрига Москва орқали Қозоғистон, Ҳиндистон, Голландия ва Венгрия давлатларидан ҳам транзит рейслар борлиги маълум бўлди. Лекин, букри пашша чиққан атиргуллар бошқа давлатлардан келтирилган деган фикрдан йироқмиз. Бу ҳозирча дастлабки суриштирув натижаси, холос. Ўзбекистондаги барча ҳудудий инспекцияларга расмий топшириқ орқали ўрганганимизда букри пашша ҳашорати ҳудудимизда қайд этилмади. Аслида букри пашша кўпроқ Россия ва бошқа давлатларда тарқалган», — деди Дилшод Анорбоев.
Ўсимликлар карантини давлат инспекцияси вакилларининг қўшимча қилишича, Россия ҳукуматидан маълумот олинганидан сўнг, ички суриштирув-назорат ишларини охирига етказиб, оммага бу масала бўйча алоҳида маълумот тақдим этилади.
Изоҳ (0)