Bandlik vazirligi O‘zA tomonidan e’lon qilingan “Sahnalashtirilgan qabul yoki Bandlik va mehnat munosabatlari vaziri Farg‘ona viloyatiga nega kelgandi?” sarlavhali maqolaga munosabat bildirdi.
Maqolada Sherzod Kudbiyevning Farg‘onada 28-iyun kungi sayyor qabuli yuzaki o‘tkazilgani, vazir asli qarindoshining to‘yiga borgani ta’kidlangan.
Vazirlik matbuot xizmatining ma’lum qilishicha, ushbu qabul jarayonida Farg‘ona aholisidan kelib tushgan bandlik, mehnat huquqi, imtiyozli kreditlar va mehnat migratsiyasiga doir savol va muammolari o‘rganilgan. Tadbir doirasida 53 nafar fuqaro murojaatlari bilan bevosita vazir tomonidan qabul qilingan.
Mazkur maqolada qabul jarayonida ayrim fuqarolarning murojaatlari ijobiy hal etilmaganligi hamda qabul natijalari haqiqiqatdan uzoq ekanligi aytilmoqda. Maqolada keltirilgan dalillar vazirlik rahbariyati tomonidan sinchiklab o‘rganildi.
Boshqa viloyatlarda o‘tkazilgan sayyor qabullar chog‘ida bunday holatlar umuman kuzatilmaganligi va 28-iyun kuni o‘tkazilgan tadbirda aholidan tushgan murojatlar natijalariga Farg‘ona viloyati Bandlik boshkarmasi rasman javobgar ekanligini inobatga olgan holda, Bandlik va mehnat munosabatlari vazirligi Farg‘onadagi sayyor qabul jarayonida kelib tushgan 53 ta murojat ustidan vazir o‘rinbosari B. Umurzoqov boshchiligida ishchi guruh bilan ichki tekshiruv o‘tkazish qarorini qabul qildi.
Tekshiruv natijalari xususida yana batafsil axborot beriladi.
Izoh (0)