Axborot va ommaviy kommunikatsiyalar agentligida bo‘lib o‘tgan matbuot anjumanida ishtirok etgan “O‘zneftgaz” AJ boshqaruv raisi Bahodir Siddiqov O‘zbekistonda qozoq benzini paydo bo‘lishi haqidagi gap-so‘zlarga oydinlik kiritdi. Bu haqda “Daryo” muxbiri Sevara Nishonova xabar berdi.
Uning so‘zlariga ko‘ra, o‘zbek bozori bugungi kunda barcha sheriklari uchun ochiq, lekin shaxsiy manfaatlar ham inobatga olinadi.
“Asosiy maqsad – odamlarga tanlash imkoniyatini yaratib, mahalliy bozorni yetarli darajada sifatli yoqilg‘i bilan ta’minlash”, — deydi Siddiqov.
Qayd etilishicha, O‘zbekiston sheriklari uchun neft mahsulotlari bozorini ochish bo‘yicha choralar ko‘rmoqda. Mamlakatda allaqachon yuqori sifatli yoqilg‘i yetkazib berayotgan “Lukoyl”ning shoxobchasi faoliyat yuritadi, kelajakda “Tatneft” kompaniyasining shoxobchalari faoliyat yuritishni boshlaydi.
“Shuningdek, Qozog‘iston va Xitoy avtomobil yoqilg‘i quyish shoxobchalari bilan hamkorlikni yo‘lga qo‘yish rejalarimiz bor. Qozog‘istondan benzin sotib olish haqidagi xabarlar ilgari erishilgan kelishuvlar natijasi. Buxoro neftni qayta ishlash zavodiga neftni import qilib, uni u yerda qayta ishlab, xususiy mahsulot olish ustuvor vazifalarimizdan sanaladi. Agar qozoq benzini bizda mavjud bo‘lgan narxlar bilan raqobatlasha olsa, bu yerda hech qanday muammo bo‘lmaydi”, - deydi Siddiqov.
Izoh (0)