“O‘zbekneftgaz” rahbari: Gazning nafaqat milliy boylik, balki tovar ekanligini ham unutmasligimiz kerak

Bugun, 28-iyun kuni Axborot va ommaviy kommunikatsiyalar agentligida O‘zbekistonning neft-gaz siyosati muammolari va istiqbollari, shuningdek, aholini energiya manbalari bilan ta’minlash mavzusida matbuot anjumani bo‘lib o‘tdi, deb xabar berdi “Daryo” muxbiri Sevara Nishonova.

Tadbirda Energetika vazirligi tomonidan amalga oshirilayotgan, rejalashtirilayotgan ishlar bilan birga sohadagi muammolar haqida ham ma’lumot berildi.

“Biz geologik qidiruv ishlarini o‘z vaqtida moliyalashtirish, zaxiralarimizni o‘stirishga yetarlicha e’tibor bermayapmiz. Shuning hisobiga bugun gaz qazib olishdagi muammolarga duch kelmoqdamiz. Eng asosiy muammo — hozirda konlarimiz juda qiyin ahvolda”, — dedi “O‘zbekneftgaz” AJ boshqaruv raisi Bahodir Siddiqov.

“Juda ko‘p tanqidlarga uchrayapmiz, ommaviy axborot vositalarida ‘Nega o‘zimizning gazimizni o‘zimizga bermayapti’ degan savollarga to‘qnash kelyapmiz. Bunda muhim jihat shundaki, gaz tabiiy va milliy boyligimiz bo‘lish bilan birga, tovar (mahsulot) ekanini esdan chiqarib qo‘ymasligimiz kerak. Yaqinda Osiyo taraqqiyot banki ekspertining maqolasi chiqdi, u ‘Energetika tizimida gazga tovar sifatida munosabat shakllanmasa, bu tizimda rivojlanish bo‘lmaydi’, deb yozgan edi. Buni juda to‘g‘ri fikr deb hisoblayman. Chunki biz gazdan foydalanganda energiya tejamkorligini, vaqtida hisob-kitob qilish kerakligini esdan chiqarib qo‘yyapmiz. Ko‘p iste’molchilarimizda kranni burasak, gaz chiqib kelaveradi degan qarash singib qolgan”, — deya so‘zlarini davom ettirdi “O‘zbekneftgaz” rahbari.

Baxtiyor Siddiqov mavjud muammolarni bartaraf etish uchun amalga oshirilayotgan ishlarga ham to‘xtalib o‘tdi:

“Shu muammolarning oldini olish maqsadida avtomatlashtirilgan tizimni joriy etish bo‘yicha katta muzokaralar olib borilmoqda. Uch yil davomida respublikamizdagi barcha aholi qatlamini, iste’molchilarni avtomatlashtirilgan tizimga o‘tkazamiz. Bu shaffoflikni, iste’molchi va gaz yetkazib beruvchi o‘rtasidagi munosabatlarning ochiqligini ta’minlaydi. O‘ylaymanki, mazkur loyiha aholining gaz iste’molini ham tartibga soladi”.