Bugun, 28-iyun kuni Axborot va ommavy kommunikatsiyalar agentligida bo‘lib o‘tgan matbuot anjumanida O‘zbekiston Energetika vazirining birinchi o‘rinbosari, “O‘zatom” agentligi direktori Jo‘rabek Mirzamahmudov mamlakatda ilk AES qurilishi rejalashtirilayotgan Tuzkon ko‘li xavfsizligi masalasida ma’lumot berdi. Bu haqda “Daryo” muxbiri Sevara Nishonova xabar berdi.
“Biz qancha suv kerakligi va suvdan qanday foydalanilishi haqida juda ko‘p gapirdik. Bug‘ni ishlab chiqish, elektr energiyasini generanatsiya qilish, sovitish uchun AES tomonidan sarf qilinadigan suv miqdori bizning hozirgi issiqlik elektr stansiyalarimizdagi suv sarfidan ko‘p emas. Ayni vaqtda atrof-muhitni ifloslantiradigan ajratmalar, oqindi suvlar bo‘lmaydi.
Vengriyadagi quvvati 440 megavatt bo‘lgan va SSER texnologiyasi qo‘llaniladigan AESda suv Dunay daryosidan olinib, yana uning o‘ziga oqiziladi — bunda ekologiyaga hech qanday ta’sir bo‘lmaydi. U yerda bemalol baliq ovlashadi — AES sharofati bilan suv iliqlashib, u yerda baliqlar avvalgidan ham ko‘paygan”, — dedi Jo‘rabek Mirzamahmudov.
“O‘zatom” rahbarining ta’kidlashicha, hozirda agentlik AESning atrof-muhitga ta’sirini baholash yuzasidan Davlat ekologiya qo‘mitasi bilan hamkorlikda ish olib bormoqda:
“Tuzkon Ramsar konvensiyasiga kirishini bilamiz, bu borada Davlat ekologiya qo‘mitasi bilan birga ishlayapmiz. Atrof-muhitga ta’sirni baholash bo‘yicha ishlar boshlanganini bir necha bor ma’lum qildik, u barcha zaruriy hisob-kitoblarni o‘z ichiga oladi, ekspertizalar o‘tkaziladi”.
“AESdan tashqaridagi sohil bo‘yida yashash, ishlash, cho‘milish, suratga tushish mumkin bo‘ladi... Albatta, butun dunyoda bo‘lgani singari, bu yerda ham turkumlashtirilgan ob’ektlarga xos cheklovlar bo‘ladi”, — deydi Mirzamahmudov.
Jo‘rabek Mirzamahmudovning qayd etishicha, xorijda AESning ekologik toza bo‘lishiga juda qat’iy talablar qo‘yiladi.
“Ekologik monitoring har bir perimetrda har bir yo‘nalish bo‘yicha olib borilmoqda, bu AES atrofidagi bir necha kilometr maydonni ham o‘z ichiga oladi. AES qurilganidan so‘ng ekologik vaziyat yanada yaxshilanadi”, — dedi u.
“O‘zatom” rahbari bu so‘zlariga dalil sifatida Ukrainadagi Xmelnitskiy AES tahlil laboratoriyalari boshqa ishlab chiqarish obyektlarining suvga oqizayotgan chiqindilarini aniqlashga imkon berganini keltirdi.
Uning qo‘shimcha qilishicha, Tuzkon ko‘lining suvi AES reaktorlarini sovitish uchun yetadi. “Bunday hisob-kitoblar olib borilmoqda va biz sovitishning turli variantlarini ko‘rib chiqyapmiz”, — deya aniqlik kiritdi Jo‘rabek Mirzamahmudov.
Izoh (0)