Prezident maktablariga saralash imtihonlari 26-iyun — 3-iyul kunlari davomida bo‘lib o‘tadi

Xalq ta’limi vaziri Sherzod Shermatov o‘zining Facebook’dagi sahifasida Prezident maktablariga hujjat topshirganlar soni juda ko‘p kishini tashkil etayotgani va ular o‘rtasida saralash imtihonlari o‘tkazilishini bildirdi.

Birinchi yili Prezident maktablariga 5—10-sinf qabul qilinganda 144 nafar (6x24) o‘quvchi qabul qilinadi, ya’ni 4 ta maktabga umumiy 576 nafar o‘quvchi degani. Bu maktablarga qiziqish juda yuqori bo‘lgani sababli shu kungacha 28 446 nafar nomzod hujjat topshirgan, ya’ni bir o‘ringa deyarli 50 nafar nomzod raqobat qiladi!

“Namanganda 5-sinfga raqobat esa deyarli 1 o‘ringa 120 nafar o‘quvchi! Bu hali faqat matematika va tabiiy fanlardan “5” baho olganlarning hujjatlari qabul qilinganida shunday katta raqobat yuzaga keldi. Agarda maktabdagi bahoga qaralmay hammaga hujjat topshirishga ruhsat berilganda bir o‘ringa 1,5 ming nafar o‘quvchi raqobat qilishi va bu esa faqat ortiqcha muammo keltirib chiqarishi tabiiy edi”, — deb yozadi xalq ta’limi vaziri.

Kembridj Assessment tomonidan bizga shunday shart qo‘yilgandi: agar bir o‘ringa nomzodlar soni 20 nafardan ortiq bo‘lsa, saralash imtihoni o‘tkaziladi deb. Shu sababli ushbu haftada joylarda saralash imtihonlari o‘tkaziladi.

Asosiy imtihonlar iyul oyida o‘tkaziladi.

Umuman olganda, 28 446 nafar nomzoddan 576 nafari oxirida xursand bo‘lib ushbu maktablarda o‘qishsa, qolgan 27870 nafari qabul qilinmaganligi sababli norozi bo‘lishi mumkin.

Hurmatli ota-onalar!

Shu vaqtga qadar deyarli hech qanday qabul imtihonlarida bir o‘ringa bu kabi katta raqobat bo‘lmagan.Sizlardan iltimos, avvalo hammamiz bir-birimizni o‘zaro hurmat qilgan holda imtihonlarni tartibli o‘tkazib olaylik! Ikkinchidan, agar farzandingiz imtihonlardan muvaffaqiyatli o‘ta olmagan taqdirda ham uni koyimasdan, ko‘nglini ko‘tarishga harakat qilinglar. Imtihonda qatnashish ham o‘ziga xos kelgusida farzandingiz uchun foydali bo‘lgan tajribadir.

Afsuski, tabeldagi baholarni noqonuniy tuzatishlar kiritilgani bo‘yicha yuzga yaqin holatlar ham aniqlandi, lekin hujjat topshirayotganda ota-onalar “bila turib yolg‘on ma’lumotlarni taqdim etish farzandimning natijalarini e’lon qilinishidan oldin istalgan bosqichda tanlovdan chiqarilishiga olib kelishidan xabardorman” deb imzo chekishgan.

Sherzod Shermatov, xalq ta’limi vaziri