Халқ таълими вазири Шерзод Шерматов ўзининг Facebook’даги саҳифасида Президент мактабларига ҳужжат топширганлар сони жуда кўп кишини ташкил этаётгани ва улар ўртасида саралаш имтиҳонлари ўтказилишини билдирди.
Биринчи йили Президент мактабларига 5—10-синф қабул қилинганда 144 нафар (6х24) ўқувчи қабул қилинади, яъни 4 та мактабга умумий 576 нафар ўқувчи дегани. Бу мактабларга қизиқиш жуда юқори бўлгани сабабли шу кунгача 28 446 нафар номзод ҳужжат топширган, яъни бир ўринга деярли 50 нафар номзод рақобат қилади!
«Наманганда 5-синфга рақобат эса деярли 1 ўринга 120 нафар ўқувчи! Бу ҳали фақат математика ва табиий фанлардан «5» баҳо олганларнинг ҳужжатлари қабул қилинганида шундай катта рақобат юзага келди. Агарда мактабдаги баҳога қаралмай ҳаммага ҳужжат топширишга руҳсат берилганда бир ўринга 1,5 минг нафар ўқувчи рақобат қилиши ва бу эса фақат ортиқча муаммо келтириб чиқариши табиий эди», — деб ёзади халқ таълими вазири.
Кембридж Ассессмент томонидан бизга шундай шарт қўйилганди: агар бир ўринга номзодлар сони 20 нафардан ортиқ бўлса, саралаш имтиҳони ўтказилади деб. Шу сабабли ушбу ҳафтада жойларда саралаш имтиҳонлари ўтказилади.
Асосий имтиҳонлар июль ойида ўтказилади.
Умуман олганда, 28 446 нафар номзоддан 576 нафари охирида хурсанд бўлиб ушбу мактабларда ўқишса, қолган 27870 нафари қабул қилинмаганлиги сабабли норози бўлиши мумкин.
Ҳурматли ота-оналар!Шу вақтга қадар деярли ҳеч қандай қабул имтиҳонларида бир ўринга бу каби катта рақобат бўлмаган.Сизлардан илтимос, аввало ҳаммамиз бир-биримизни ўзаро ҳурмат қилган ҳолда имтиҳонларни тартибли ўтказиб олайлик! Иккинчидан, агар фарзандингиз имтиҳонлардан муваффақиятли ўта олмаган тақдирда ҳам уни койимасдан, кўнглини кўтаришга ҳаракат қилинглар. Имтиҳонда қатнашиш ҳам ўзига хос келгусида фарзандингиз учун фойдали бўлган тажрибадир.
Афсуски, табелдаги баҳоларни ноқонуний тузатишлар киритилгани бўйича юзга яқин ҳолатлар ҳам аниқланди, лекин ҳужжат топшираётганда ота-оналар «била туриб ёлғон маълумотларни тақдим этиш фарзандимнинг натижаларини эълон қилинишидан олдин исталган босқичда танловдан чиқарилишига олиб келишидан хабардорман» деб имзо чекишган.
Шерзод Шерматов, халқ таълими вазири
Изоҳ (0)