Iste’molchilar huquqlarini himoya qilish jamiyatlari federatsiyasiga 1 yildan ortiqroq vaqt mobaynida elektr energiyasidan asossiz qarzdorlik, hududlarda elektr tokining tez-tez o‘chib turishi, ta’minotdagi va boshqa muammolar bo‘yicha kelib tushgan murojaatlar asosida OAV orqali 250 ma’lumot e’lon qilindi. Lekin mutasaddi tashkilotlar ularga arzirli javob, munosabat bildirmadi. Bu haqda federatsiya bo‘lim boshlig‘i Sherali Sattorov ma’lum qilgan.
Farg‘ona viloyatining Uchko‘prik tumanidagi Jaloyer qishlog‘ida yashovchi Sh.Mamajonov 958 ming, shu tumanning Kichik Qashqar qishlog‘ida yashovchi Q.Qoraboyevga 2 million 129 ming, Mullazoir qishlog‘ida istiqomat qiluvchi O‘.Madaliyevga 2 million 631 ming so‘m qarzdorlik noto‘g‘ri hisoblangani aniqlandi.
Shuningdek, elektr ta’minoti bilan bog‘liq kelib tushgan murojaatlar asosida ma’lum bo‘lishicha, Samarqand viloyati Pastdarg‘om tumanida yashovchi Sh.Abdullаevga 5 million 800 ming so‘m, Namangan viloyati Uychi tumanida istiqomat qiluvchi S.Mamadaliyevaga 20 million 24 ming so‘m, Xorazm viloyati Xazorasp tumanida yashovchi K.Sultonovaga 23 million 241 ming so‘m, Qashqadaryo viloyati Kasbi tumanida istiqomat qiluvchi B.Eshonqulovga 23 million 445 ming so‘m, K.Ochilovga 44 million 44 ming 294 so‘m asossiz qarzdorlik belgilangan.
Jizzax shahri, Yunusobod ko‘chasi yashovchi S.Karimovga esa elektr energiyasi iste’moli uchun asossiz ravishda 249 million 847 ming so‘m qarz hisoblangan.
Bunday misollarni yana ko‘plab keltirish mumkin. Elektr ta’minoti korxonasi ba’zi xodimlarining iste’molchilardan ta’magirlik yo‘li bilan pul olishi, bitta jarimani bir yo‘la ikki familiyadoshga yozilishi, marhumlarga qarzdorlik hisoblab berishi, ularning sud ishida guvoh sifatida chaqirilganiga to‘xtalinmadi.
Izoh (0)