Истеъмолчилар ҳуқуқларини ҳимоя қилиш жамиятлари федерациясига 1 йилдан ортиқроқ вақт мобайнида электр энергиясидан асоссиз қарздорлик, ҳудудларда электр токининг тез-тез ўчиб туриши, таъминотдаги ва бошқа муаммолар бўйича келиб тушган мурожаатлар асосида ОАВ орқали 250 маълумот эълон қилинди. Лекин мутасадди ташкилотлар уларга арзирли жавоб, муносабат билдирмади. Бу ҳақда федерация бўлим бошлиғи Шерали Сатторов маълум қилган.
Фарғона вилоятининг Учкўприк туманидаги Жалоер қишлоғида яшовчи Ш.Мамажонов 958 минг, шу туманнинг Кичик Қашқар қишлоғида яшовчи Қ.Қорабоевга 2 миллион 129 минг, Муллазоир қишлоғида истиқомат қилувчи Ў.Мадалиевга 2 миллион 631 минг сўм қарздорлик нотўғри ҳисоблангани аниқланди.
Шунингдек, электр таъминоти билан боғлиқ келиб тушган мурожаатлар асосида маълум бўлишича, Самарқанд вилояти Пастдарғом туманида яшовчи Ш.Абдуллаевга 5 миллион 800 минг сўм, Наманган вилояти Уйчи туманида истиқомат қилувчи С.Мамадалиевага 20 миллион 24 минг сўм, Хоразм вилояти Хазорасп туманида яшовчи К.Султоновага 23 миллион 241 минг сўм, Қашқадарё вилояти Касби туманида истиқомат қилувчи Б.Эшонқуловга 23 миллион 445 минг сўм, К.Очиловга 44 миллион 44 минг 294 сўм асоссиз қарздорлик белгиланган.
Жиззах шаҳри, Юнусобод кўчаси яшовчи С.Каримовга эса электр энергияси истеъмоли учун асоссиз равишда 249 миллион 847 минг сўм қарз ҳисобланган.
Бундай мисолларни яна кўплаб келтириш мумкин. Электр таъминоти корхонаси баъзи ходимларининг истеъмолчилардан таъмагирлик йўли билан пул олиши, битта жаримани бир йўла икки фамилиядошга ёзилиши, марҳумларга қарздорлик ҳисоблаб бериши, уларнинг суд ишида гувоҳ сифатида чақирилганига тўхталинмади.
Изоҳ (0)