Shahrisabz shahridagi 15-sonli maktabgacha ta’lim muassasasida 1-iyun kuni 138 nafar bolaga 1 kilogramm go‘sht berilgan. Buni o‘sha kungi taomnoma fosh qildi, deya xabar beradi “Daryo” muxbiri.
“Daryo” muxbirining ma’lum qilishicha, ushbu bolalar bog‘chasida boshqa kunlari ham bolalar ovqati uchun ajratilayotgan go‘shtdan qariyb 3 kilogrammdan “urib qolinayotgani” ma’lum bo‘lgan.
Bunga bog‘cha hamshirasi munosabat bildirar ekan, holatga ta’minotchi aybdor ekanligini ma’lum qildi.
— O‘sha kuni ta’minotchi qancha go‘sht bergan bo‘lsa, hammasini solganmiz, — deydi bog‘cha hamshirasi Nargiza Bobomurodova. – Men ham ta’minotchidan kelgan mahsulotga qarab “menyu” yozdim.
Shahrisabz shahar maktabgacha ta’lim bo‘limining aniqlik kiritishicha, mazkur muassasani go‘sht bilan ta’minlovchi ta’minotchi “Pahlavon germes” MChJ hisoblanadi.
1–4-iyun kunlari uchun muassasa hamshirasi tomonidan yozilgan taomnomaga ko‘z yugurtirganimizda 1-iyun kunidan tashqari 3 kun ketma-ket 138 nafar bolaga 11 kilogrammdan go‘sht berilgan. Ma’lum bo‘lishicha, viloyatda faoliyat olib boruvchi barcha MTMlarda na’munaviy taomnoma asosida ovqat pishiriladi. Demakki, har bir bolaga belgilab berilgan mahsulot miqdori aniq ko‘rsatiladi.
Mazkur MTM taomnomasida go‘sht mahsuloti har bir bolaga bir kuni 100 gramm yozilsa, ertasiga 110 yoki 90 gramm yozilmoqda.
— Agar go‘sht mol go‘shti bo‘lsa 100 gramm, kurka go‘shti bo‘lsa 110 gramm yoziladi, — deydi hamshira.
“90 gramm yozilishi nima sababdan?” — deya so‘raganimizda bu savolga javob berolmadi.
4-iyun kungi kuzatuvlarimiz davomida aniqlanishicha, o‘sha kuni 136 nafar tarbiyalanuvchiga ovqat tayyorlangan. Bu safar ham har doimgidek 11 kilogramm go‘shtdan foydalanilgan. Ammo o‘sha kuni bog‘chada, tarbiyachilarning aytishicha, 111 nafar bola bo‘lgan. Amalda esa 75 nafar bola borligi ma’lum bo‘ldi.
Tarbiyachilar o‘sha kuni ota-onalar farzandini har doimgi vaqtidan ertaroq olib ketganini aytdi. Biroq olib ketish uchun ota-ona tomonidan yozilgan tilxatni taqdim etmadi.
Ushbu jarayonlarni kuzatar chog‘i soat millari 14:30 ni ko‘rsatayotgan bo‘lsa-da, bog‘cha oshpazining ish vaqti tugab allaqachon ketib bo‘lgan ekan. Shuning uchun, shu kuni tushdan so‘ng soat 15:00 dagi ovqat taqdiri bilan qiziqdik.
Ma’lum bo‘lishicha, oshpaz tushdan so‘ng 15:00 da har bir bolaga 200 grammdan berilishi lozim bo‘lgan kefir va bulochkalarni tarbiyachilarga qoldirgan.
Bog‘cha mudirasining qo‘shimcha qilishicha, mazkur bog‘cha 2018-yil kapital ta’mirga tushgan bo‘lib, “Obod mahalla” davlat Dasturiga ko‘ra 1 milliard 400 million so‘m mablag‘ ajratilgan. Ammo bir hafta o‘tgach bu mablag‘ 310 million so‘mga kamaygan. Sababini surishtirishsa, bog‘cha uchun ajratilgan mablag‘ning 1 milliard 90 million so‘mi Shahrisabz shahrida tashkil etilgan “Xalqaro maqom festivali” tayyorgarligi uchun yo‘naltirilgan degan javobni olishgan.
Gapning indallosini aytganda bog‘cha ta’miri uchun ajratilgan mablag‘ bir haftada qayergadir yo‘q bo‘lib qolgan. Oqibatda bog‘chadagi muammolar o‘z holicha qolib ketgan.
Izoh (0)