17-iyun kuni Jizzax viloyati Forish tumanidagi “Yangi qishloq” jome masjidi binosi qurilishiga ilk tamal toshi qo‘yildi. Bu haqda O‘zbekiston musulmonlari idorasi matbuot xizmati xabar berdi.
Marosimda Jizzax viloyat hokimi o‘rinbosari E.Ismatov, viloyat bosh imom-xatibi Mehmonali Jabborov va boshqa mutasaddilar, masjid jamoati ishtirok etdi.
“Yig‘ilganlar xayrli duo, ezgu niyatlar bilan tabarrukona birinchi g‘ishtni qo‘yib berdilar. Masjid tez orada qad ko‘tarib, hudud aholisining diniy-ma’rifiy bilimlari, axloqi, ibodatlari uchun munavvar maskan bo‘lib xizmat qilishini tiladi”, — deyiladi xabarda.
Alohida qayd etish lozimki, mazkur masjid Jizzax-Nurota-Navoiy katta yo‘li yoqasida joylashgan bo‘lib, ziyorat turizmi hamda mahalliy yo‘lovchilarning ibodatlarini ado etib olishlari uchun qulay nuqta hisoblanadi.
Shu bois, olti sotixdan ortiq maydonda qurilayotgan yangi masjid 800 kishini sig‘dira oladigan katta xonaqoh, tahoratxona, ayollar uchun namozxona, qo‘shimcha ma’muriy xonalardan iborat bo‘lishi rejalashtirilgan. Ahamiyatlisi, masjid hovlisida yordamchi xo‘jalik tashkil etilib, issiqxona barpo etish ko‘zda tutilgan.
Izoh (0)