Bosh prokuror o‘rinbosari Erkin Yo‘ldoshev jurnalistlar bilan 17-iyun kuni bo‘lib o‘tgan ochiq muloqot chog‘ida Said-Abdulaziz Yusupovning rafiqasi va advokatining gaplari bilan prokuratura bayonotlaridagi tafovutga izoh berib o‘tdi. Bu haqda “Daryo” muxbiri Musulmonbek Ibrohimov xabar bermoqda.
Said-Abdulaziz Yusupov juda ko‘p miqdorda firibgarlik sodir etganlikda gumon qilinib 10-may kuni ushlangan, DXX Tergov boshqarmasi tomonidan jinoyat ishida ayblanuvchi tariqasida ishtirok etishga jalb qilinib, 12-may kuni unga nisbatan qamoq tarzidagi ehtiyot chorasi qo‘llanilgan edi.
U qo‘lga olingandan so‘ng, Yusupovning rafiqasi bir qator OAVlarga intervyu berib, erining og‘ir kasalligi borligini, shu tufayli tibbiy yordamga muhtojligini ma’lum qilgan edi. Bunga javoban Bosh prokuratura Yusupovning salomatligi holati shifokorlar tomonidan tekshirilib, uni qamoqda saqlanishiga to‘sqinlik qiluvchi alomatlar aniqlanmaganini ma’lum qilgandi.
Keyinroq, Yusupovning onasi J.Bakayeva 7-iyun kuni Bosh prokuratura rahbariyati qabulida bo‘lib, tergov jarayonida o‘g‘li jismoniy qiynoqqa solinayotganligi haqida murojaat qilgan va o‘g‘lini uning himoyachisi ishtirokida tibbiy ko‘rikdan o‘tkazishni so‘ragan (bundan avval Yusupov o‘z advokatiga uni ‘uraverib, ichini to‘kib tashlashgani’ni aytgani haqida xabarlar chiqqandi).
8-iyunda Bosh prokuratura tomonidan advokat A.Shoymardonov va tergov ustidan nazorat olib boruvchi prokuror D.Rahmatullayev ishtirokida mutaxassis-shifokorlarni jalb qilgan holda ayblanuvchi Said-Abdulaziz Yusupov tibbiy ko‘rikdan o‘tkazilganda uning tanasida biror-bir tan jarohati yoki qiynoq alomatlari aniqlanmagan.
Bosh prokuror o‘rinbosari Erkin Yo‘ldoshevning aytishicha, har qanday jinoyat ishida ayblanuvchi tomon noqonuniy tergov holatlari bo‘yicha shikoyat qilishi mumkin. Bu murojaatlar tekshiriladi va baho beriladi:
Har qanday jinoyat ishi bo‘yicha himoyachi, ayblanuvchi, uning qarindoshlari noqonuniy tergov usullari qo‘llanilgani haqida ariza bilan shikoyat qilishi mumkinligi, aybsizligi haqida vajlar keltirishi mumkin. Bu murojaatlar qonunda qat’iy belgilab qo‘yilgan protsessual tartibda tekshiriladi va baho beriladi.Avvalroq, Said-Abdulaziz Yusupovga nisbatan u rahbarlik qilgan O‘zbekiston bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondining 270 million so‘m pul mablag‘larini o‘zlashtirish aybi ham ilgari surilayotgani ma’lum qilingan edi.Jinoyat ishi bo‘yicha haqiqiy holat taraflarning vajlari yoki bayonotlariga, yoki bo‘lmasa tergov organining subyektiv fikriga qarab baholanmaydi. Buning uchun dalil va isbot kerak. Said-Abdulaziz Yusupovning qarindoshlari va prokuratura bayonotlari o‘rtasidagi farqlar jinoyat ishini tugatish uchun asos bo‘lmaydi.
Bayonot farazlar emas, obyektiv tekshiruvning rasmiy natijalari, dalillar asosida berilgan. Tergovda Yusupovning jinoiy faoliyatiga aloqador bo‘lishi mumkin bo‘lgan barcha holatlar batafsil tekshiriladi. Bu tergov olib borish tartibini belgilovchi protsessual normalar talabidir.
Erkin Yo‘ldoshev, bosh prokuror o‘rinbosari
Izoh (0)