Oliy sud matbuot xizmati sobiq rafiqasini o‘ldirish uchun qotil yollagan fuqaro haqidagi maqolani e’lon qildi. Quyida maqola to‘liqligicha e’tiboringizga havola etiladi.
Qibraylik Gulnoza Xalilova (ism-shariflar o‘zgartirilgan) Mansur Shoqahhorov bilan 2002-yilda turmush qurdi.
Turmushlari davomida ular 3 farzandli bo‘ldi va hammasi risoladigidek edi.
Nima bo‘ldi-yu, kunlardan bir kuni o‘rtalarida janjal chiqdi va oradan 9 yil o‘tib, ajrashishga qaror qilishdi. 2011-yili rasman ajrashishdi. Biroq ko‘rishib turishdi, hatto birga yashashdi.
M.Shoqahharov 2011-yil boshlarida Rossiyaga ishlash uchun ketdi. Oradan 6 oy o‘tib, Mansur sobiq xotinini Rossiyaga ishlagani taklif etdi.
- Kel, bu yerda senga ish bor, mo‘may pul ishlab topamiz, - dedi.
Gulnoza darhol rozi bo‘ldi. Bolalarini onasinikida qoldirib, Rossiyaga ravona bo‘ldi.
Qarangki, sobiq er-xotin Rossiyada ham birga yashadi. Mansur avtomashina tuzatish ishlari bilan shug‘ullanardi.
2014-yilda Gulnoza O‘zbekistonga qaytdi. Farzandlari bilan qaynonasinikida yashay boshladi.
U ketgach, eri o‘sha taraflarda andijonlik Sayyora ismli qiz bilan tanishib qoldi. Uchrashib turishdi. 2015-yil avgust oyida birga yurtga qaytishdi.
Mansur Sayyoraga rasman uylandi. Ko‘p qavatli uylardan birida yashay boshlashdi. O‘rtalarida bir farzand dunyoga keldi.
M.Shoqahharov yurtga qaytgach, xususiy firmalardan birida rahbar bo‘ldi. Ishlari ancha yurishdi.
Gulnoza hamon qaynonasinikida yashar, erining ikkinchi xotini bilan yashashi unga alam qilardi.
O‘zaro janjallardan charchagan qaynona Gulnozaga uydan chiqib ketishni talab qildi.
- Qayerga ham borardim, uyim bo‘lmasa, uy olib beringlar chiqib ketay, - yalindi kelin.
- Hech qanday uy yo‘q senga, tuyog‘ingni shiqillat, bu uydan yo‘qol! -baqirdi qaynona.
Gulnoza sobiq eridan uy olib berishini talab qila boshladi.
Mansur hozircha buning imkoni yo‘qligini bahona qildi.
Ammo sobiq xotin Mansurning 6 sotix uy sotib olib, u yerda ikkinchi xotini Sayyora bilan yashayotganini bilardi.
Janjallardan bezgan o‘g‘il va ona Gulnozani qurilishi tugallanmagan bir xonali uyga chiqarib yubordi.
Gulnozaning aytishicha, uy juda xarob ahvolda edi va gaz hidi anqirdi.
Gulnoza bu uyda yashay olmadi. Yana qaynonasining uyiga qaytib bordi.
Mansur unga uy sotib olib berishni va’da qildi. Axir o‘rtada 3 nafar farzandi bor. 2019-yil boshlarida Gulnozani yana o‘sha qarovsiz bir xonali uyga yuklari bilan keltirib tashladi.
Gaz hidi Gulnozani kasal qildi. O‘sha kuni Mansurga qo‘ng‘iroq qildi.
Bu gaz hidi sening o‘lishing uchun chiqib yotibdi, - deb aloqani uzdi Mansur.So‘ngra Gulnoza nima qilishini bilmay tuman xotin-qizlar qo‘mitasiga qo‘ng‘iroq qildi... U yerdan vakil keldi, ammo biror tayinli ish bo‘lmadi. M.Shoqahharov esa sobiq xotinidan qutulish yo‘llarini qidirdi.
O‘z qo‘lida ishlovchi Bobur Jo‘rayevni qotillikka yolladi.
B.Jo‘rayevning sudda bergan ko‘rsatmasida muqaddam sudlanib chiqqani, chilangar ekani, bir muddat Shuhrat ismli sherigi bilan Mansurning uyida ishlaganligi, bir kuni u bilan bo‘lgan suhbatda turmush o‘rtog‘ini o‘ldirib yuborishi evaziga pul taklif qilganligini aytib berdi.
Ya’ni bir kuni Mansur ustani chaqirib: - Ishlasangiz ham, ishlamasangiz ham, men sizga oylik chiqarib beraman, faqat anavi ishni amalga oshirmasak bo‘lmaydi, - dedi.
-Niyatingiz jiddiymi?-Shunday! - dedi boshliq.
Oradan 3—4 kun o‘tib, rahbar yana qo‘ng‘iroq qildi va o‘sha ishni amalga oshirishni eslatadi. Mansur so‘zida qat’iy turib olgan, tezroq birinchi xotinidan qutilishni istardi. “Qilgan jinoyatimizning umuman hidi chiqmasligi kerak”, - dedi u qat’iy.
“Xizmat haqim nima bo‘ladi?”, - so‘radi chilangar.
Mansur avvaliga 2 000 AQSh dollari berishni va’da qildi, keyin va’dasini o‘zgartirib, 1 500 AQSh dollariga tushirdi.
Uni ham bo‘lib-bo‘lib berishini aytdi. Chilangar ilgari qamalib chiqqan, tabiiyki, yana qamoqqa tushishni istamasdi. Bu yoqda beriladigan pul ham “haligidaqa”.
U o‘ylab ko‘rib, 11-fevral kuni ertalab, to‘g‘ri Toshkent viloyati IIBga borib, Mansurning odam o‘ldirishga buyurtma berganligi haqida ariza yozib berdi.
Tezkor guruh ishga kirishdi. Chilangarga ovoz yozuvchi moslama berildi.
Firma rahbariga go‘yoki chilangar ishni do‘ndirganday qilib ko‘rsatildi. Gulnoza Xalilova “o‘ldirildi”.
Mansur va chilangar Salar shaharchasida uchrashishdi. Mansur Shoqahhorov dastlabki 400 ming so‘m pulni ustaga berayotgan payt qo‘lga olindi...
Sudlanuvchi Mansur Shoqahhorov JKning bir necha moddalari bilan aybli deb topilib, 8 yil-u 6 oy muddatga ozodlikdan mahrum etildi. Tayinlangan jazoni umumiy tartibli kaloniyada o‘tash belgilandi.
Izoh (0)