“Ijtimoiy fikr” respublika jamoatchilik fikrini o‘rganish markazi tomonidan 2019-yilda o‘tkazilgan korrupsiya bo‘yicha so‘rovda qatnashganlarning 66,5 foizi O‘zbekistonda korrupsiya singari salbiy holat tarqalgan deb hisoblaydi. Bu haqda 15-iyun kuni bo‘lib o‘tgan Korrupsiyaga qarshi kurashish bo‘yicha respublika idoralararo komissiyasining kengaytirilgan majlisida Oliy Majlis Senati raisi Nig‘matilla Yo‘ldoshev aytib o‘tdi, deya xabar bermoqda “Daryo” muxbiri Musulmonbek Ibrohimov.
Senat raisi Nig‘matilla Yo‘ldoshev davlat organlarining mansabdor shaxslarning fuqarolar bilan shaffof muloqoti to‘liq yo‘lga qo‘yilmagani oqibatda fuqarolarda korrupsiya haqidagi ilgari shakllangan tasavvurlari deyarli o‘zgarmasdan kelayotganini ma’lum qildi.
“Davlat organlarida zamonaviy axborot-kommunikatsiya texnologiyalari yetarlicha joriy qilinmagan, mansabdor shaxslarning fuqarolar bilan shaffof muloqoti to‘liq yo‘lga qo‘yilmagan. Oqibatda xalqaro jamoatchilik va fuqarolarimizning O‘zbekistondagi korrupsiya bilan bog‘liq holat haqidagi ilgari shakllangan tasavvurlari deyarli o‘zgarmasdan qolmoqda”, — dedi Senat raisi Nig‘matilla Yo‘ldoshev.
Nig‘matilla Yo‘ldoshev bunga misol qilib “Ijtimoiy fikr” respublika jamoatchilik fikrini o‘rganish markazi tomonidan joriy yilda o‘tkazilgan korrupsiya bo‘yicha so‘rov natijalarini ko‘rsatdi:
“Ijtimoiy fikr” respublika jamoatchilik fikrini o‘rganish markazi tomonidan joriy yilda o‘tkazilgan korrupsiya bo‘yicha so‘rov natijalari ham xavotirlidir. Zotan, so‘rovda qatnashganlarning 66,5 foizi O‘zbekistonda korrupsiya singari salbiy holat tarqalgan deb hisoblaydi. Qariyb 17 foiz ishtirokchilar korrupsiya hamma joy va sohalarni qamrab olgan degan fikrdadir. 29 foiz so‘ralganlar esa, mansabdorlarning har ikkinchisi korrupsioner deb hisoblaydi.Siz va bizni mas’ul sifatida o‘ylantiradigan yana bir ko‘rsatkich borki, u barchamizni tom ma’noda ogohlikka chaqirishi kerak.
So‘rovda ishtirok etganlarning 26 foizi mamlakatda korrupsiyaga qarshi o‘tkazilayotgan kurashda ochiqlik va oshkoralik, uni ommaviy axborot vositalarida yoritish ishlarini yetarli emas va bu holat korrupsiyaning asosiy sabablaridan deb hisoblaydi.
Izoh (0)