15-iyun kuni ertalab ijtimoiy tarmoqlarda Andijon shahridagi 1-kichik daha, “Yoyilma” mahallasi hududidagi to‘rt qavatdan iborat 1-uyning tom qismida sodir bo‘lgan yong‘in to‘g‘risida videolavhalar paydo bo‘ldi. Ushbu voqea yuzasidan “Daryo” muxbiri voqea joyiga borib, jurnalistik surishtiruv olib bordi.
Shahar hokimligi bergan ma’lumotlarga, mazkur uy 6 ta podyezd, 64 xonadondan iborat bo‘lib, 180 nafardan ortiq aholi istiqomat qiladi. Bino 1972-yilda qurib bitkazilgan, o‘tgan yili ta’mirlash ishlari olib borilgan.
Jamila Otaboyeva shu uydagi xonadonlardan birida istiqomat qiladi. Yong‘indan ilk xabardor bo‘lganlardan biri.
— Bugun dam olish kuni bo‘lganligi sababli, ertalabdan farzandim bilan pastdagi gulxonani obodonlashtirishga kirishgan edik, — deydi Jamila Otaboyeva. — Bir payt turli ovozlar eshitila boshlandi. Qayerdan kelayotganini bilish uchun atrofga razm soldim. Dastlab hech narsani payqamadik. Tom tarafga qaraganimda burqsab tutun chiqayotganini ko‘rib qoldim. Qora tutun butun uyni qamrab olgandi. Vaqtdan yutkazmaslik uchun darhol yong‘in xavfsizligi xizmatiga qo‘ng‘iroq qildim. Qo‘shnilarni xabardor qilishga intildim. Bu orada o‘t o‘chiruvchilarning bir qismi yetib keldi. Keyin o‘nga yaqin mashinalar qo‘shildi. Yong‘in alangaga aylanib ulgurganligi uchun tinimsiz suv sepishardi. Yarim soatlar chamasi qilingan harakat natijasida yong‘in bartaraf etildi.
— Uyimizining tomida yong‘in chiqqanini eshitib shok holatga tushib qoldik, - deydi ushbu uyda yashovchi “Aslzoda” shirkati raisi Muhabbatxon Qodirova. — Oramizda katta va kichik yoshdagilar bor emasmi, eshitib hushidan ketganlar ham bo‘ldi. Tez yordam mashinalari zudlik bilan yetib kelib murojaat qilganlarga birinchi tibbiy yordamni ko‘rsatdi. Eng asosiysi, hech kim hech qanday talofat ko‘rganlar yo‘q, qurbonlar bo‘lmadi. Olov xonadonlarga tutashmagani ham bizni baxtimiz, desam adashmayman. Yong‘inni o‘chirish davomida Andijon shahri hokimi biz bilan suhbat o‘tkazib, sabrli bo‘lishimizni so‘radi.
Favqulodda vaziyatlar boshqarmasi yong‘in xavfsizligi boshqarmasi boshlig‘i, podpolkovnik Jasurbek Karimovning ma’lum qilishicha, yong‘in elektr simining qisqa tutashuvidan kelib chiqqani taxmin qilinmoqda. Uning natijasida 500 kvadrat metr tom qismi zarar ko‘rgan.
– Ushbu hodisa yuzasidan zudlik bilan ishchi guruh tashkil qilindi va barcha podyezdlarda o‘rganishlar boshlab yuborildi, — deydi Jasurbek Karimov. — Ayni paytda xonadonlarga bittama-bitta kirilib elektr va gaz tizimlarining soz yoki nosozligi tekshirilmoqda. Shuningdek, fuqarolarga xavfsizlik qoidalariga rioya etishlari bo‘yicha tushuntirish ishlari olib borilmoqda.
Andijon shahri hokimi Dilmurod Rahmatullayevga ko‘ra, baxtsiz hodisa va uni natijasida yetkazilgan moddiy zararni aniqlash bo‘yicha hokimlik tomonidan maxsus ishchi guruhi tuzilgan.
— Zarar ko‘rgan joylarni tozalash va obodonlashtirish ishlarini amalga oshirish uchun shahar obodonlashtirish boshqarmasi xodimlari, yordam qo‘lini cho‘zishni istagan mahalla faollari va shu uyda yashovchi xodimlar jalb etildi, — deydi shahar hokimi.
— Yong‘in bartaraf etilgach bir soat mobaynida tom yog‘och, tunuka qoldiklaridan tozalandi. Tozalash ishlari tugagach bu yerda quruvchi tashkilotlar ishni boshlaydi. Hozirga qadar yangi qurilish materiallari yetkazib kelinmoqda. Barcha xarajatlar mahalliy budjet hisobidan qoplanadi va bir hafta mobaynida tom qaytadan yopilib, yangilanadi.
Izoh (0)