Коррупция бўйича сўровда иштирок этганларнинг 66 фоизи Ўзбекистонда коррупция тарқалган деб ҳисоблайди

«Ижтимоий фикр» республика жамоатчилик фикрини ўрганиш маркази томонидан 2019 йилда ўтказилган коррупция бўйича сўровда қатнашганларнинг 66,5 фоизи Ўзбекистонда коррупция сингари салбий ҳолат тарқалган деб ҳисоблайди. Бу ҳақда 15 июнь куни бўлиб ўтган Коррупцияга қарши курашиш бўйича республика идоралараро комиссиясининг кенгайтирилган мажлисида Олий Мажлис Сенати раиси Ниғматилла Йўлдошев айтиб ўтди, дея хабар бермоқда «Дарё» мухбири Мусулмонбек Иброҳимов.

Сенат раиси Ниғматилла Йўлдошев давлат органларининг мансабдор шахсларнинг фуқаролар билан шаффоф мулоқоти тўлиқ йўлга қўйилмагани оқибатда фуқароларда коррупция ҳақидаги илгари шаклланган тасаввурлари деярли ўзгармасдан келаётганини маълум қилди.

«Давлат органларида замонавий ахборот-коммуникация технологиялари етарлича жорий қилинмаган, мансабдор шахсларнинг фуқаролар билан шаффоф мулоқоти тўлиқ йўлга қўйилмаган. Оқибатда халқаро жамоатчилик ва фуқароларимизнинг Ўзбекистондаги коррупция билан боғлиқ ҳолат ҳақидаги илгари шаклланган тасаввурлари деярли ўзгармасдан қолмоқда», — деди Сенат раиси Ниғматилла Йўлдошев.

Ниғматилла Йўлдошев бунга мисол қилиб «Ижтимоий фикр» республика жамоатчилик фикрини ўрганиш маркази томонидан жорий йилда ўтказилган коррупция бўйича сўров натижаларини кўрсатди:

«Ижтимоий фикр» республика жамоатчилик фикрини ўрганиш маркази томонидан жорий йилда ўтказилган коррупция бўйича сўров натижалари ҳам хавотирлидир. Зотан, сўровда қатнашганларнинг 66,5 фоизи Ўзбекистонда коррупция сингари салбий ҳолат тарқалган деб ҳисоблайди. Қарийб 17 фоиз иштирокчилар коррупция ҳамма жой ва соҳаларни қамраб олган деган фикрдадир. 29 фоиз сўралганлар эса, мансабдорларнинг ҳар иккинчиси коррупционер деб ҳисоблайди.

Сиз ва бизни масъул сифатида ўйлантирадиган яна бир кўрсаткич борки, у барчамизни том маънода огоҳликка чақириши керак.

Сўровда иштирок этганларнинг 26 фоизи мамлакатда коррупцияга қарши ўтказилаётган курашда очиқлик ва ошкоралик, уни оммавий ахборот воситаларида ёритиш ишларини етарли эмас ва бу ҳолат коррупциянинг асосий сабабларидан деб ҳисоблайди.