Oliy Majlis Senati raisi Nig‘matilla Yo‘ldoshev poraxo‘rlik illati jamiyatning “bosh og‘rig‘i” bo‘lib kelganini ta’kidladi. U bu haqda 15-iyun kuni Korrupsiyaga qarshi kurashish bo‘yicha respublika idoralararo komissiyasining kengaytirilgan majlisida aytib o‘tdi, deya xabar bermoqda “Daryo” muxbiri Musulmonbek Ibrohimov.
Kengaytirilgan majlisda Prezident Shavkat Mirziyoyevning 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi farmonida belgilab berilgan vazifalar muhokama qilindi.
Oliy Majlisi Senati raisi, Korrupsiyaga qarshi kurashish bo‘yicha respublika idoralararo komissiyasining raisi Nig‘matilla Yo‘ldoshev korrupsiya ko‘p yillardan buyon mavjudligi va u jamiyatning “bosh og‘rig‘i” bo‘lib kelgani haqida aytib o‘tdi.
“Eng xatarli jihat shundaki, korrupsiyaning ildizlari juda olis tarixga borib taqaladi va u ayrim toifadagi odamlar, ayniqsa, davlat xizmatidagi ba’zi mansabdorlar va mas’ullarning qon-qoniga singib ketgan tom ma’nodagi kasallikdir. Birgina misol: muqaddas dinimizning ‘Pora olgan ham, uni bergan ham do‘zaxiydir’, degan qat’iy hukmi barcha zamonlar uchun bu illat jamiyatning ‘bosh og‘rig‘i’ bo‘lib kelganidan dalolatdir”, — dedi Nig‘matilla Yo‘ldoshev.
Oliy Majlis Senati raisinin qo‘shimcha qilishicha, jamiyatni bu kasallikdan batamom xalos etishning hamma uchun birdek maqbul vositasi haligacha o‘ylab topilmagan.
Ma’lum qilinishicha, 2018-yilda pora bilan bog‘lig‘liq og‘ir jinoyatni sodir etgan 2 ming nafarga yaqin mansabdor shaxs jinoiy javobgarlikka tortilgan.
Izoh (0)