Samarqand viloyatining Oqdaryo tumani hokimi Feruz Abilovning davlat raqami 30 330 SAA bo‘lgan Captiva rusumli xizmat avtomobili old qismiga o‘zboshimchilik bilan “migalka” (stroboskop) o‘rnatilganligi aniqlandi. Bu haqda O‘zA xabar bermoqda.
Holat yuzasidan chora ko‘rish bo‘yicha tuman IIB YHXB Oqdaryo tuman bo‘limi boshlig‘i katta inspektor leytenant N.Ibragimovga murojaat etildi. Ma’muriy huquqbuzarlik amaldor — tuman hokimining xizmat avtomobili bilan bog‘lik ekanligi uchun turli bahonalar bilan inkor qilinishiga harakat sezildi.
Shundan so‘ng ushbu holat Samarqand viloyat IIB YHXB boshqarmasida muhokama qilindi va boshqarma rahbariyati aralashuvi natijasida huquqbuzarlik yuzasidan ma’muriy bayonnoma rasmiylashtirildi.
Eslatib o‘tamiz, oldinroq Oqdaryo tuman hokimligi joriy yil aprelida viloyat teleradiokompaniyasining “Ochiq muloqot” ko‘rsatuvida fuqarolardan kelib tushgan 50 dan ortiq murojaat yuzasidan haligacha chora ko‘rmaganligi ma’lum qilingandi.
Izoh (0)