20-may kuni Toshkent shahar hokimligida Jahongir Ortiqxo‘jayev ilgari anhor bo‘yida joylashgan va buzilgan 78-uy egalari bilan uchrashdi, deb xabar berdi Toshkent shahar hokimligi matbuot xizmati.
Hozirgi kunda uchrashuv ishtirokchilari yangi manzilda – Qozirobod ko‘chasida yana o‘sha anhor bo‘yidagi 7 ta xonadonlarning egalari bo‘ldi.
Uchrashuvda shuningdek, Toshkent shahar hokimining arxitektura, kapital qurilish va kommunikatsiyalarni rivojlantirish bo‘yicha birinchi o‘rinbosari Davron Hidoyatov, Shayxontohur tuman hokimi Abduqahhor To‘xtayev, Kapital qurilish Bosh boshqarmasi vakillari va Toshkent shahar hokimiyati qoshidagi “Mijozlarni qo‘llab-quvvatlash yagona xizmati” injinering kompaniyasi direktori Sobir Aripovlar taklif etildi.
Uchrashuvga yangi uylardagi kommunikatsiya xizmatlarining qisman ulanmaganligi sabab bo‘ldi. Ayni paytda ushbu uylarda gaz va elektr ta’minoti yo‘lga qo‘yilgan. Suv ta’minoti esa hokimiyat mas’ullari so‘zlariga ko‘ra, markaziy kanalga ulangan bo‘lib, tez orada to‘liq yo‘lga qo‘yiladi.
Shuningdek, sobiq 78-uy boshka aholisining Qori Niyoziy ko‘chasidagi uylarga ko‘chishi masalasi ko‘tarildi. Biroq, bugungi kunda yangi uylarda qurilish ishlari davom etayotgani sabab, u yerga ko‘chib o‘tishning imkoni yo‘q.
Ochiq suhbat uslubida o‘tgan uchrashuvda fuqarolar o‘z muammolarini aytdi. Xususan, yangi uyga ko‘chish jarayonining kechikayotganligi va shu tufayli hozirda yashayotgan uylarining ijara haqi oshayotgani to‘g‘risida hamda yakuniy ta’mirlash ishlari bilan bog‘liq noqulayliklar haqida o‘z muammolarini ma’lum qildi. 30 ta velosiped uchun turargoh ajratish masalasi inobatga olinib, bu borada zarur ko‘rsatmalar berildi.
Uchrashuv davomida Toshkent shahar hokimi Jahongir Ortiqxo‘jayev ushbu kamchiliklarga yo‘l qo‘ygan, yangi uylar topshirilishining kechikishiga sababchi bo‘lgan va boshqa kommunikatsion va ta’mir ishlari bo‘yicha sustkashlikka yo‘l qo‘ygan tegishli mutasaddilarni tanqid qildi.
Ushbu mavjud kamchiliklarni bartaraf etish bo‘yicha ishlar nazorati Shayxontohur tuman hokimi Abduqahhor To‘xtayev, uning o‘rinbosari, shahar hokimining arxitektura, kapital qurilish va kommunikatsiyalarni rivojlantirish bo‘yicha birinchi urinbosari Davron Hidoyatov zimmasiga yuklatildi hamda voqealar rivoji haqida hokimni xabardor qilib turish vazifasi topshirildi.
Barcha kamchiliklarni bartaraf etish uchun 25-may shanba kunigacha muddat belgilanib, ijara haqi to‘lovi muamosi ham ijobiy hal qilindi. Ko‘chish va mebellarni tashish uchun transport bilan ham ta’minlash haqida ko‘rsatma berildi.
Izoh (0)