Жаҳонгир Ортиқхўжаев Анҳор бўйидаги 78-уй аҳолиси билан учрашди

20 май куни Тошкент шаҳар ҳокимлигида Жаҳонгир Ортиқхўжаев илгари анҳор бўйида жойлашган ва бузилган 78-уй эгалари билан учрашди, деб хабар берди Тошкент шаҳар ҳокимлиги матбуот хизмати.

Ҳозирги кунда учрашув иштирокчилари янги манзилда – Қозиробод кўчасида яна ўша анҳор бўйидаги 7 та хонадонларнинг эгалари бўлди.

Учрашувда шунингдек, Тошкент шаҳар ҳокимининг архитектура, капитал қурилиш ва коммуникацияларни ривожлантириш бўйича биринчи ўринбосари Даврон Ҳидоятов, Шайхонтоҳур туман ҳокими Абдуқаҳҳор Тўхтаев, Капитал қурилиш Бош бошқармаси вакиллари ва Тошкент шаҳар ҳокимияти қошидаги «Мижозларни қўллаб-қувватлаш ягона хизмати» инжинеринг компанияси директори Собир Ариповлар таклиф этилди.

Учрашувга янги уйлардаги коммуникация хизматларининг қисман уланмаганлиги сабаб бўлди. Айни пайтда ушбу уйларда газ ва электр таъминоти йўлга қўйилган. Сув таъминоти эса ҳокимият масъуллари сўзларига кўра, марказий каналга уланган бўлиб, тез орада тўлиқ йўлга қўйилади.

Шунингдек, собиқ 78-уй бошка аҳолисининг Қори Ниёзий кўчасидаги уйларга кўчиши масаласи кўтарилди. Бироқ, бугунги кунда янги уйларда қурилиш ишлари давом этаётгани сабаб, у ерга кўчиб ўтишнинг имкони йўқ.

Очиқ суҳбат услубида ўтган учрашувда фуқаролар ўз муаммоларини айтди. Хусусан, янги уйга кўчиш жараёнининг кечикаётганлиги ва шу туфайли ҳозирда яшаётган уйларининг ижара ҳақи ошаётгани тўғрисида ҳамда якуний таъмирлаш ишлари билан боғлиқ ноқулайликлар ҳақида ўз муаммоларини маълум қилди. 30 та велосипед учун тураргоҳ ажратиш масаласи инобатга олиниб, бу борада зарур кўрсатмалар берилди.

Учрашув давомида Тошкент шаҳар ҳокими Жаҳонгир Ортиқхўжаев ушбу камчиликларга йўл қўйган, янги уйлар топширилишининг кечикишига сабабчи бўлган ва бошқа коммуникацион ва таъмир ишлари бўйича сусткашликка йўл қўйган тегишли мутасаддиларни танқид қилди.

Ушбу мавжуд камчиликларни бартараф этиш бўйича ишлар назорати Шайхонтоҳур туман ҳокими Абдуқаҳҳор Тўхтаев, унинг ўринбосари, шаҳар ҳокимининг архитектура, капитал қурилиш ва коммуникацияларни ривожлантириш бўйича биринчи уринбосари Даврон Ҳидоятов зиммасига юклатилди ҳамда воқеалар ривожи ҳақида ҳокимни хабардор қилиб туриш вазифаси топширилди.

Барча камчиликларни бартараф этиш учун 25 май шанба кунигача муддат белгиланиб, ижара ҳақи тўлови муамоси ҳам ижобий ҳал қилинди. Кўчиш ва мебелларни ташиш учун транспорт билан ҳам таъминлаш ҳақида кўрсатма берилди.