Operatorlar va provayderlar Yagona interaktiv davlat xizmatlari portaliga kirishni 1-iyuldan bepul qilishi mumkin, deb xabar berdi “Gazeta.uz”. Bu Axborot texnologiyalari va kommunikatsiyalarini rivojlantirish vazirligi tomonidan tayyorlangan Prezident qarori loyihasida ko‘zda tutilgan.
Xabarda aytilishicha, bundan ko‘zlangan maqsad telekommunikatsiya tarmoqlarining jadal rivojlanishiga salbiy ta’sir ko‘rsatadigan omillarni bartaraf etib, davlat elektron xizmatlaridan foydalanish hamda hududlarda raqamli iqtisodiyotni rivojlantirish imkoniyatlarini oshirish hisoblanadi.
Hujjatga ko‘ra, Turizmni rivojlantirish davlat qo‘mitasiga madaniyat vazirligi bilan hamkorlikda sayyohlik obyektlarida, xususan, 2019-yilda Samarqand, Buxoro va Xiva obyektlarida davlat va xususiy sektor hamkorligi asosida ommaviy Wi-Fi nuqtalarini bosqichma-bosqich tashkil etish vazifasini yukalatish rejalashtirilgan.
Olis va qishloq aholi punktlaridagi budjet tashkilotlari uchun davlat va xususiy sektor hamkorligi asosida telekommunikatsiya infratuzilmasini yaratgan operatorlar va provayderlar uchun (mobil operatorlar bundan mustasno) 10 yil davomida quyidagilarga kafolat beriladi:
- Ushbu aholi punktlaridagi budjet tashkilotlari va davlat unitar tashkilotlariga ularning xizmatlaridan foydalanish;
- Ulanish nuqtasidan qat’i nazar “O‘zbektelekom” kompaniyasining yagona tariflari asosida internetdan foydalanish;
- Ushbu tashkilotga xizmat ko‘rsatish uchun mo‘ljallangan telekommunikatsiya obyektlarini, shuningdek, mintaqadagi davlat va boshqa yuridik shaxslarni joylashtirish uchun bo‘sh joy va infratuzilmani bepul taqdim etish.
Izoh (0)