Bo‘z tumanidagi Mustaqillikning 15 yilligi mahallasida joylashgan “Quyoshcha” bolalar yozgi oromgohida Andijon viloyatidagi 3-sektor ishchi guruhi fuqarolarning murojaatlari bo‘yicha sayyor qabul o‘tkazdi. Bu haqda viloyat ichki ishlar boshqarmasi matbuot xizmati “Daryo”ga xabar berdi.
200 dan ortiq aholi vakillari qatnashgan qabulda yo‘llarni shag‘allash, ichimlik va oqava suvi, imtiyozli kreditlar, suyultirilgan gaz ballonlari ajratilishi, hududda maktabgacha ta’lim muassasasini qurish, fuqarolarning salomatligini tiklash va nogironlik aravachalari bilan ta’minlash bo‘yicha 50 dan ortiq murojaat qabul qilingan.
— 17 yildan buyon sarson-sargardonman, nohaqliklarning qurboniman, — deydi Bo‘ston mahallasida istiqomat qiluvchi, 63 yoshli Tursunoy Olimova. — O‘zimning besh nafar farzandim bor. Yana Turkiyaga ketib yo‘qolgan singlimning to‘rt nafar farzandini vasiylikka olganman. Ko‘p bolali oila deb 1994-yilda tuman hokimligi menga Mustaqillik ko‘chasidagi, 72-uyning 5-xonadonini order asosida bergan. O‘g‘illarimni uylab chiqarmoqchi edim. To‘y qilish maqsadida 2002-yilda Rossiyaga ishlagani ketganimda qo‘shnim Jamila Badalovadan bolalarim 80 ming so‘m qarz olishgan ekan. Menga aytishmagan. Yosh hamda nogiron bo‘lganligi uchun ishlab vaqtida to‘lasha olmagan. Keyin u kalitni tortib olib boshqa bir ayolga hech qanday hujjatsiz sotib yuborgan. Qarzni o‘sha paytdayoq qaytishim bilan to‘lab qo‘ydim. Lekin kalitni qaytarib bermadi. Uyni sotib olgan odamga uchrashimni aytdi. Sudra-sudra bilan shuncha yil o‘tdi. Qanchadan qancha tashkilotlarga uchradim hal bo‘lmayapti. Sudga beray desam u ayol Rossiyada. Nima qilishimni bilmayman. Uyimiz bo‘la turib bir o‘g‘lim qaynonasinikida, yana biri ijarada yashaydi. Men bilan ikkala qizim va uch nafar farzandi yashaydi.
Tursunoy Olimovaning masalasi tegishli tashkilotlar vakillari tomonidan o‘rganilib, tez orada qonuniy tartibda hal qilinishi belgilandi.
— 14 yoshli farzandim yurak porogi bilan maxsus ro‘yxatda turadi, — deydi Yangiobod mahallasida yashovchi Oyazimxon Qodirova. – Shifokorlari ayni shu yoshida operatsiya qilish imkoniyati borligini aytib, Toshkentdagi shifoxonalardan biriga yo‘llanma berishdi. Ular yaxshi kutib olib, ko‘riklardan o‘tkazishdi. Ammo operatsiya uchun 17 million so‘m to‘lov qilishimiz zarurligini aytishdi. Buncha pulni to‘lashga imkoniyatimiz yo‘q. Shu kungacha hech kimdan yordam so‘ramadim. Ammo bugun ilojsizligim, bolamni hayotini asrab qolish maqsadida ushbu sayyor qabulga kelishga majbur bo‘ldim.
Ushbu masalani uchinchi sektorga biriktirilgan viloyat sog‘liqni saqlash boshqarmasi vakili joyida o‘rganib, may oyida operatsiya uchun bepul yo‘llanma berilishini bildirdi. Ungacha esa viloyat ko‘p tarmoqli markaziy poliklinikasi shifokorlari tomonidan nazoratga olinadigan bo‘ldi.
Qabul davomida Chorvador, Dehqonobod, Bo‘ston, Nurafshon, Guzar, Yakka tol, Madaniyat, Sarbon, Mustaqillikning 15 yilligi, Guliston, Sariq jo‘ga, G‘olib, Mehnatobod mahallalarida istiqomat qiluvchi ehtiyojmand oilalarga 10 ta gaz ballon hamda 7 nafar imkoniyati cheklangan shaxslarga nogironlik aravachasi va quloq eshitgich moslamalari tarqatildi. Yana 5 nafar fuqaroning esa bandligi ta’minlandi.
Izoh (0)