Бўз туманидаги Мустақилликнинг 15 йиллиги маҳалласида жойлашган «Қуёшча» болалар ёзги оромгоҳида Андижон вилоятидаги 3-сектор ишчи гуруҳи фуқароларнинг мурожаатлари бўйича сайёр қабул ўтказди. Бу ҳақда вилоят ички ишлар бошқармаси матбуот хизмати «Дарё»га хабар берди.
200 дан ортиқ аҳоли вакиллари қатнашган қабулда йўлларни шағаллаш, ичимлик ва оқава суви, имтиёзли кредитлар, суюлтирилган газ баллонлари ажратилиши, ҳудудда мактабгача таълим муассасасини қуриш, фуқароларнинг саломатлигини тиклаш ва ногиронлик аравачалари билан таъминлаш бўйича 50 дан ортиқ мурожаат қабул қилинган.
— 17 йилдан буён сарсон-саргардонман, ноҳақликларнинг қурбониман, — дейди Бўстон маҳалласида истиқомат қилувчи, 63 ёшли Турсуной Олимова. — Ўзимнинг беш нафар фарзандим бор. Яна Туркияга кетиб йўқолган синглимнинг тўрт нафар фарзандини васийликка олганман. Кўп болали оила деб 1994 йилда туман ҳокимлиги менга Мустақиллик кўчасидаги, 72-уйнинг 5-хонадонини ордер асосида берган. Ўғилларимни уйлаб чиқармоқчи эдим. Тўй қилиш мақсадида 2002 йилда Россияга ишлагани кетганимда қўшним Жамила Бадаловадан болаларим 80 минг сўм қарз олишган экан. Менга айтишмаган. Ёш ҳамда ногирон бўлганлиги учун ишлаб вақтида тўлаша олмаган. Кейин у калитни тортиб олиб бошқа бир аёлга ҳеч қандай ҳужжатсиз сотиб юборган. Қарзни ўша пайтдаёқ қайтишим билан тўлаб қўйдим. Лекин калитни қайтариб бермади. Уйни сотиб олган одамга учрашимни айтди. Судра-судра билан шунча йил ўтди. Қанчадан қанча ташкилотларга учрадим ҳал бўлмаяпти. Судга берай десам у аёл Россияда. Нима қилишимни билмайман. Уйимиз бўла туриб бир ўғлим қайнонасиникида, яна бири ижарада яшайди. Мен билан иккала қизим ва уч нафар фарзанди яшайди.
Турсуной Олимованинг масаласи тегишли ташкилотлар вакиллари томонидан ўрганилиб, тез орада қонуний тартибда ҳал қилиниши белгиланди.
— 14 ёшли фарзандим юрак пороги билан махсус рўйхатда туради, — дейди Янгиобод маҳалласида яшовчи Оязимхон Қодирова. – Шифокорлари айни шу ёшида операция қилиш имконияти борлигини айтиб, Тошкентдаги шифохоналардан бирига йўлланма беришди. Улар яхши кутиб олиб, кўриклардан ўтказишди. Аммо операция учун 17 миллион сўм тўлов қилишимиз зарурлигини айтишди. Бунча пулни тўлашга имкониятимиз йўқ. Шу кунгача ҳеч кимдан ёрдам сўрамадим. Аммо бугун иложсизлигим, боламни ҳаётини асраб қолиш мақсадида ушбу сайёр қабулга келишга мажбур бўлдим.
Ушбу масалани учинчи секторга бириктирилган вилоят соғлиқни сақлаш бошқармаси вакили жойида ўрганиб, май ойида операция учун бепул йўлланма берилишини билдирди. Унгача эса вилоят кўп тармоқли марказий поликлиникаси шифокорлари томонидан назоратга олинадиган бўлди.
Қабул давомида Чорвадор, Деҳқонобод, Бўстон, Нурафшон, Гузар, Якка тол, Маданият, Сарбон, Мустақилликнинг 15 йиллиги, Гулистон, Сариқ жўга, Ғолиб, Меҳнатобод маҳаллаларида истиқомат қилувчи эҳтиёжманд оилаларга 10 та газ баллон ҳамда 7 нафар имконияти чекланган шахсларга ногиронлик аравачаси ва қулоқ эшитгич мосламалари тарқатилди. Яна 5 нафар фуқаронинг эса бандлиги таъминланди.
Изоҳ (0)