Checheniston rahbari Ramzan Qodirovning ma’lum qilishicha, Ahmad Qodirov nomidagi fond Moskvadagi avtohalokatda rafiqasi va qizi halok bo‘lgan Roman Romenkovga yangi “Niva” avtomobilini sotib olishga va’da berdi. Bu haqda “Interfaks” xabar berdi.
“Roman Romenkov va halok bo‘lganlarning barcha yaqinlari va qarindoshlariga butun chechen xalqi nomidan yana bir bor hamdardlik bildiraman. Albatta, tinch paytda eng yaqin kishilarini yo‘qotgan odamlar dardiga hech narsa taskin berolmaydi. Yaratganning o‘zi bunday judolikni boshidan o‘tkazganlarga kuch-quvvat bersin”, — degan Ramzan Qodirov o‘zining Telegram-kanalida.
25-mart kuni Moskvada Mercedes Gelandewagen va “Niva” mashinasi to‘qnashib ketgan. Niva mashinasida bo‘lgan ayol va uning qizi halok bo‘lgan, rulda bo‘lgan erkak esa og‘ir jarohatlar bilan kasalxonaga yotqizilgan.
Avtohalokat sodir bo‘lishida gumon qilinayotgan Mersedes haydovchisi voqea joyidan yashiringan. Huquq-tartibot organlari uni qidiruvga bergan. Taxminlarga ko‘ra, haydovchi chechenistonlik Muslim Jambekov bo‘lgan.
28-mart kuni Checheniston rahbari Ramzan Qodirov erkakni politsiyaga kelib, o‘z aybi uchun javob berishni talab qilgan. “Agar haqiqatan ham chechenistonlik, erkak, musulmon bo‘lsang, xalqing va oilangni sharmanda qilmay, qilmishingga javob berishing kerak”, — degan Ramzan Qodirov.
29-mart kuni Jambekov Grozniy shahridagi politsiya bo‘linmasiga kelib, o‘z aybiga iqror bo‘lgan. U qilmishidan pushaymon ekanligini, qonun bilan nazarda tutilgan har qanday jazoga tayyor ekanligini bildirgan.
Izoh (0)