Рамзан Қодиров Москвадаги автоҳалокатда аёли ва қизи ҳалок бўлган эркакка янги машина олиб беришга ваъда берди

Чеченистон раҳбари Рамзан Қодировнинг маълум қилишича, Аҳмад Қодиров номидаги фонд Москвадаги автоҳалокатда рафиқаси ва қизи ҳалок бўлган Роман Роменковга янги «Нива» автомобилини сотиб олишга ваъда берди. Бу ҳақда «Интерфакс» хабар берди.

«Роман Роменков ва ҳалок бўлганларнинг барча яқинлари ва қариндошларига бутун чечен халқи номидан яна бир бор ҳамдардлик билдираман. Албатта, тинч пайтда энг яқин кишиларини йўқотган одамлар дардига ҳеч нарса таскин беролмайди. Яратганнинг ўзи бундай жудоликни бошидан ўтказганларга куч-қувват берсин», — деган Рамзан Қодиров ўзининг Telegram-каналида.

25 март куни Москвада Mercedes Gelandewagen ва «Нива» машинаси тўқнашиб кетган. Нива машинасида бўлган аёл ва унинг қизи ҳалок бўлган, рулда бўлган эркак эса оғир жароҳатлар билан касалхонага ётқизилган.

Автоҳалокат содир бўлишида гумон қилинаётган Мерседес ҳайдовчиси воқеа жойидан яширинган. Ҳуқуқ-тартибот органлари уни қидирувга берган. Тахминларга кўра, ҳайдовчи чеченистонлик Муслим Жамбеков бўлган.

28 март куни Чеченистон раҳбари Рамзан Қодиров эркакни полицияга келиб, ўз айби учун жавоб беришни талаб қилган. «Агар ҳақиқатан ҳам чеченистонлик, эркак, мусулмон бўлсанг, халқинг ва оилангни шарманда қилмай, қилмишингга жавоб беришинг керак», — деган Рамзан Қодиров.

29 март куни Жамбеков Грозний шаҳридаги полиция бўлинмасига келиб, ўз айбига иқрор бўлган. У қилмишидан пушаймон эканлигини, қонун билан назарда тутилган ҳар қандай жазога тайёр эканлигини билдирган.