2019–2020-o‘quv yilidan boshlab Toshkent davlat agrar universiteti Andijon filialida Belarusning Grodno davlat agrar universiteti hamkorligida “Zootexniya” va “Menejment” bakalavriat yo‘nalishlari bo‘yicha qo‘shma fakultet tashkil etiladi.
Toshkent davlat agrar universiteti Andijon filiali xalqaro aloqalar bo‘limi boshlig‘i Bahodirjon Nosirovning “Daryo”ga ma’lum qilishicha, joriy yilning 18–21-mart kunlari Grodno davlat agrar universiteti rektori Pestis Vitold boshchiligidagi delegatsiya Andijon viloyatiga tashrif buyurdi. Uning asosiy maqsadi hamkorlikda qishloq xo‘jaligi fakultetini tashkil etib, rus tilida ta’lim beruvchi qo‘sh diplomli dasturlarni yo‘lga qo‘yishdan iboratdir. O‘zbekiston va Belarus diplomlarini olish imkonini beruvchi mazkur dasturlar dastlabki bosqichda “Zootexniya” va “Menejment” yo‘nalishlari bo‘yicha bakalavriatda ta’lim berishni nazarda tutadi hamda istiqbolda kengaytirib boriladi.
Talabalar maxsus kirish imtihonlari orqali qabul qilinadi va dastlabki 2 yilini Andijonda, keyingi 2 yil esa Grodnoda o‘qiydi. Buning uchun har ikkala tomondan tajribali mutaxassislar jalb qilinadi va hamkorlikda o‘quv rejalari hamda ularga mos o‘quv uslubiy majmualar, adabiyotlar tayyorlanadi. Shuningdek, filial qoshida rus tilida tayyorlov kurslarini ochib o‘qitish ham shartnomada ko‘zda tutilgan.
Delegatsiya a’zolari viloyat hokimligining tashabbusi bilan 100 dan ortiq fermerlar, qishloq xo‘jaligi xodimlari va filial professor-o‘qituvchilari uchun tashkil etilgan seminarda ham ishtirok etib, Grodno davlat agrar universitetining imkoniyatlari va innovatsion ishlanmalari tasvirlangan qiziqarli taqdimotlarini o‘tkazgan.
Tashrif davomida Agrokimyo va tuproqshunoslik kafedrasining tajribali mutaxassislari bilan ilmiy hamkorlik istiqbollari ham muhokama etilgan. Unda meva sabzavotchilik va uzumchilik yo‘nalishida issiqxonada yetishtirilayotgan sabzavotlar, intensiv olma bog‘ida qo‘llanayotgan zamonaviy tomchilatib sug‘orish texnologiyasi, qishloq xo‘jaligi texnikalari parki namoyish etilgan va rekonstruksiya bo‘layotgan binolardagi qurilish ishlari bilan qisqacha tanishtirilgan.
Mehmonlar tashrif davomida Navro‘z bayrami tantanalarida ishtirok etgan. Bundan tashqari Andijon va Samarqand shahrining diqqatga sazovor joylarini ziyorat qilgan.
Izoh (0)