2019–2020-ўқув йилидан бошлаб Тошкент давлат аграр университети Андижон филиалида Беларуснинг Гродно давлат аграр университети ҳамкорлигида «Зоотехния» ва «Менежмент» бакалавриат йўналишлари бўйича қўшма факультет ташкил этилади.
Тошкент давлат аграр университети Андижон филиали халқаро алоқалар бўлими бошлиғи Баҳодиржон Носировнинг «Дарё»га маълум қилишича, жорий йилнинг 18–21 март кунлари Гродно давлат аграр университети ректори Пестис Витолд бошчилигидаги делегация Андижон вилоятига ташриф буюрди. Унинг асосий мақсади ҳамкорликда қишлоқ хўжалиги факультетини ташкил этиб, рус тилида таълим берувчи қўш дипломли дастурларни йўлга қўйишдан иборатдир. Ўзбекистон ва Беларусь дипломларини олиш имконини берувчи мазкур дастурлар дастлабки босқичда «Зоотехния» ва «Менежмент» йўналишлари бўйича бакалавриатда таълим беришни назарда тутади ҳамда истиқболда кенгайтириб борилади.
Талабалар махсус кириш имтиҳонлари орқали қабул қилинади ва дастлабки 2 йилини Андижонда, кейинги 2 йил эса Гроднода ўқийди. Бунинг учун ҳар иккала томондан тажрибали мутахассислар жалб қилинади ва ҳамкорликда ўқув режалари ҳамда уларга мос ўқув услубий мажмуалар, адабиётлар тайёрланади. Шунингдек, филиал қошида рус тилида тайёрлов курсларини очиб ўқитиш ҳам шартномада кўзда тутилган.
Делегация аъзолари вилоят ҳокимлигининг ташаббуси билан 100 дан ортиқ фермерлар, қишлоқ хўжалиги ходимлари ва филиал профессор-ўқитувчилари учун ташкил этилган семинарда ҳам иштирок этиб, Гродно давлат аграр университетининг имкониятлари ва инновацион ишланмалари тасвирланган қизиқарли тақдимотларини ўтказган.
Ташриф давомида Агрокимё ва тупроқшунослик кафедрасининг тажрибали мутахассислари билан илмий ҳамкорлик истиқболлари ҳам муҳокама этилган. Унда мева сабзавотчилик ва узумчилик йўналишида иссиқхонада етиштирилаётган сабзавотлар, интенсив олма боғида қўлланаётган замонавий томчилатиб суғориш технологияси, қишлоқ хўжалиги техникалари парки намойиш этилган ва реконструкция бўлаётган бинолардаги қурилиш ишлари билан қисқача таништирилган.
Меҳмонлар ташриф давомида Наврўз байрами тантаналарида иштирок этган. Бундан ташқари Андижон ва Самарқанд шаҳрининг диққатга сазовор жойларини зиёрат қилган.
Изоҳ (0)