O‘zbekiston Respublikasi Prezidenti Shavkat Mirziyoyev joriy yil yanvar oyida Hindistonning Gujarat shtatida o‘tkazilgan “Jo‘shqin Gujarat – 2019” IX xalqaro investitsiya sammitida ishtirok etib, Hindiston bilan uzoq muddatli strategik sheriklikni mustahkamlash, ikki tomonlama hamkorlikni kengaytirish borasida qator taklif va tashabbuslarni ilgari surdi.
Davlat rahbarining ushbu tashrifidan so‘ng O‘zbekiston bilan Hindiston o‘rtasidagi innovatsiyalar bo‘yicha hamkorlikning yangi bosqichi boshlandi. Bu haqda Innovatsion rivojlanish vazirligi Matbuot xizmati xabar bermoqda.
Innovatsion rivojlanish vazirligi delegatsiyasi Hindistonning ilm-fan, ta’lim, farmatsevtika sohalaridagi tajribasini O‘zbekistonga joriy etish bo‘yicha amalga oshirilayotgan vazifalar doirasida Hindistonda bo‘lib, qator tashkilotlar va kompaniyalar vakillari bilan uchrashdi.
Vazirlik xodimlari Nyu-Dehli, Haydarobod shaharlarida bo‘ldi. Muzokaralar natijasida Hindistonning “The Global Education and Leadership Foundation” nodavlat notijorat jamg‘armasi bilan 7-9-sinf o‘quvchilarining tadbirkorlik va yetakchilik qobiliyatini rivojlantirish maqsadida “SKILLD” ta’lim dasturini joriy etishga qaror qilindi.
Buning uchun materiallar bepulga taqdim etilib, ular o‘zbek va rus tillariga tarjima qilinadi. O‘qitish sifatini oshirish uchun o‘qituvchilar uchun malaka oshirish kurslari ham tashkil etiladi. Xalq ta’limi vazirligi bilan hamkorlikda joriy yil sentabr oyida bitta davlat va bitta xususiy maktabda ushbu dastur tajriba tariqasida joriy etiladi.
Delegatsiya a’zolari “The Global Education and Leadership Foundation” bilan hamkorlikda mamlakatda Tadbirkorlik bo‘yicha global musobaqaning hududiy tanlovini o‘tkazishga kelishdi. Tanlov g‘oliblari noyabr oyida Saudiya Arabistonining Ar-Riyod shahrida o‘tadigan Tadbirkorlik bo‘yicha global musobaqada qatnashish imkoniga ega bo‘ladi.
Ushbu tanlovning rasmiy saytida ro‘yxatdan o‘tgan barcha ishtirokchilar startaplarni rivojlantirish bo‘yicha materiallardan foydalanish va video-treninglar bilan tanishishi mumkin.
Tadbirlar jadvaliga ko‘ra, hududiy tanlov g‘oliblari may oyida aniqlanadi. Hindiston tomoni yirik tashkilotlar, jahonning yetakchi universitetlari vakillarining spiker va hakamlar hay’ati sifatida ishtirok etishini ta’minlashga tayyor ekanliklarini tasdiqladi.
Mamlakatning Hindistondagi elchixonasi bilan birgalikda davlat va xususiy sektor, ilm-fan va ishlab chiqarish sohalari vakillari ishtirokida O‘zbekiston – Hindiston innovatsion forumini o‘tkazishga kelishildi. Ikki mamlakat olimlari, tadbirkorlari, investorlari, novatorlarini birlashtiruvchi mazkur forumni O‘zbekiston – Hindiston yoshlar forumi doirasida o‘tkazish taklif qilindi.
Muzokarada yoshlarda innovatsion fikrlash ko‘nikmasini shakllantirish va innovatsion g‘oyalarni ishlab chiqishga o‘rgatish maqsadida 5–11-sinf o‘quvchilari uchun maxsus uskuna va texnologiyalar bilan jihozlangan ish joylari tashkil qilish lozimligi ham muhokama etildi.
Gap shundaki, Hindistonni transformatsiyalash milliy instituti vakili vazirlik delegatsiyasi bilan Nyu-Dehlidagi mahalliy davlat maktabiga borib, ularni o‘quvchilarning innovatsion ko‘nikmalarini rivojlantirish maqsadida Hindiston hukumatining “narsalar interneti” shaklidagi maxsus texnologiyalar va uskunalar bilan jihozlangan laboratoriyalar yaratishga qaratilgan “Atal Tinkering Lab” tashabbusi bilan tanishtirdi.
Laboratoriyalar hukumat tomonidan moliyalashtiriladi, xususan, har bir maktabga laboratoriya tashkil etish uchun 2 million AQSh dollari ajratiladi. Bu mablag‘ning 15 foizi ta’mirlash ishlariga, 15 foizi mebel jihozlari xarid qilishga, 65 foizi uskunalarga, 5 foizi o‘qituvchi va o‘quvchilarning loyihalarini moliyalashtirishga sarflanadi.
“Makerspace” – “Ijod hududi” deb ataluvchi mazkur laboratoriyalar 6-11-sinf o‘quvchilari uchun mo‘ljallangan bo‘lib, ular darsdan keyin 1-2 soat vaqtini shu yerda o‘tkazadi. Hindistonda hozirgi kunda 2 ming 171 ta maktab laboratoriyasi faoliyat yuritayotgan bo‘lib, yana 5 ming 400 tasi tashkil etiladi.
Hindistonni transformatsiyalash milliy instituti 2015 yili mamlakat Bosh vaziri Narendra Modi tashabbusi bilan hukumat uchun strategik islohotlar va uzoq muddatli dasturlar ishlab chiqish va o‘tkazish maqsadida tuzilgan. Institut tomonidan tashkil etilgan “Atal Innovation Mission” qo‘mitasi yakka tartibda mehnat faoliyatiga yo‘naltirilgan innovatsion xablar, startaplarni rivojlantirish uchun kattalar va bolalarga maxsus platformalar taqdim etish orqali aholi orasida innovatsiya va tadbirkorlik madaniyatini yoymoqda.
Mana shunday laboratoriyalarning ochilishi mamlakat innovatsion ekotizimini rivojlantirishga hissa qo‘shadi. Hindistonlik hamkorlar bilan tuziladigan biznes akseleratorlar va inkubatorlar sanoat, davlat va o‘quv muassasalari o‘rtasida ko‘prik vazifasini o‘tab, dolzarb iqtisodiy- ijtimoiy muammolarni yechishga xizmat qiladi. Innovatsion ekotizimning maktablardan boshlab shakllanishi ilm-fanning turli yo‘nalishlari, ishlab chiqarish, biznes, ta’lim sohalariga kadrlar yetkazib berishning uzilmas zanjiri hosil bo‘lishiga olib keladi.
Izoh (0)