Ўзбекистон Республикаси Президенти Шавкат Мирзиёев жорий йил январь ойида Ҳиндистоннинг Гужарат штатида ўтказилган «Жўшқин Гужарат – 2019» IX халқаро инвестиция саммитида иштирок этиб, Ҳиндистон билан узоқ муддатли стратегик шерикликни мустаҳкамлаш, икки томонлама ҳамкорликни кенгайтириш борасида қатор таклиф ва ташаббусларни илгари сурди.
Давлат раҳбарининг ушбу ташрифидан сўнг Ўзбекистон билан Ҳиндистон ўртасидаги инновациялар бўйича ҳамкорликнинг янги босқичи бошланди. Бу ҳақда Инновацион ривожланиш вазирлиги Матбуот хизмати хабар бермоқда.
Инновацион ривожланиш вазирлиги делегацияси Ҳиндистоннинг илм-фан, таълим, фармацевтика соҳаларидаги тажрибасини Ўзбекистонга жорий этиш бўйича амалга оширилаётган вазифалар доирасида Ҳиндистонда бўлиб, қатор ташкилотлар ва компаниялар вакиллари билан учрашди.
Вазирлик ходимлари Нью-Деҳли, Ҳайдаробод шаҳарларида бўлди. Музокаралар натижасида Ҳиндистоннинг «The Global Education and Leadership Foundation» нодавлат нотижорат жамғармаси билан 7-9-синф ўқувчиларининг тадбиркорлик ва етакчилик қобилиятини ривожлантириш мақсадида «SKILLD» таълим дастурини жорий этишга қарор қилинди.
Бунинг учун материаллар бепулга тақдим этилиб, улар ўзбек ва рус тилларига таржима қилинади. Ўқитиш сифатини ошириш учун ўқитувчилар учун малака ошириш курслари ҳам ташкил этилади. Халқ таълими вазирлиги билан ҳамкорликда жорий йил сентябрь ойида битта давлат ва битта хусусий мактабда ушбу дастур тажриба тариқасида жорий этилади.
Делегация аъзолари «The Global Education and Leadership Foundation» билан ҳамкорликда мамлакатда Тадбиркорлик бўйича глобал мусобақанинг ҳудудий танловини ўтказишга келишди. Танлов ғолиблари ноябрь ойида Саудия Арабистонининг Ар-Риёд шаҳрида ўтадиган Тадбиркорлик бўйича глобал мусобақада қатнашиш имконига эга бўлади.
Ушбу танловнинг расмий сайтида рўйхатдан ўтган барча иштирокчилар стартапларни ривожлантириш бўйича материаллардан фойдаланиш ва видео-тренинглар билан танишиши мумкин.
Тадбирлар жадвалига кўра, ҳудудий танлов ғолиблари май ойида аниқланади. Ҳиндистон томони йирик ташкилотлар, жаҳоннинг етакчи университетлари вакилларининг спикер ва ҳакамлар ҳайъати сифатида иштирок этишини таъминлашга тайёр эканликларини тасдиқлади.
Мамлакатнинг Ҳиндистондаги элчихонаси билан биргаликда давлат ва хусусий сектор, илм-фан ва ишлаб чиқариш соҳалари вакиллари иштирокида Ўзбекистон – Ҳиндистон инновацион форумини ўтказишга келишилди. Икки мамлакат олимлари, тадбиркорлари, инвесторлари, новаторларини бирлаштирувчи мазкур форумни Ўзбекистон – Ҳиндистон ёшлар форуми доирасида ўтказиш таклиф қилинди.
Музокарада ёшларда инновацион фикрлаш кўникмасини шакллантириш ва инновацион ғояларни ишлаб чиқишга ўргатиш мақсадида 5–11-синф ўқувчилари учун махсус ускуна ва технологиялар билан жиҳозланган иш жойлари ташкил қилиш лозимлиги ҳам муҳокама этилди.
Гап шундаки, Ҳиндистонни трансформациялаш миллий институти вакили вазирлик делегацияси билан Нью-Деҳлидаги маҳаллий давлат мактабига бориб, уларни ўқувчиларнинг инновацион кўникмаларини ривожлантириш мақсадида Ҳиндистон ҳукуматининг «нарсалар интернети» шаклидаги махсус технологиялар ва ускуналар билан жиҳозланган лабораториялар яратишга қаратилган «Atal Tinkering Lab» ташаббуси билан таништирди.
Лабораториялар ҳукумат томонидан молиялаштирилади, хусусан, ҳар бир мактабга лаборатория ташкил этиш учун 2 миллион АҚШ доллари ажратилади. Бу маблағнинг 15 фоизи таъмирлаш ишларига, 15 фоизи мебел жиҳозлари харид қилишга, 65 фоизи ускуналарга, 5 фоизи ўқитувчи ва ўқувчиларнинг лойиҳаларини молиялаштиришга сарфланади.
«Makerspace» – «Ижод ҳудуди» деб аталувчи мазкур лабораториялар 6-11-синф ўқувчилари учун мўлжалланган бўлиб, улар дарсдан кейин 1-2 соат вақтини шу ерда ўтказади. Ҳиндистонда ҳозирги кунда 2 минг 171 та мактаб лабораторияси фаолият юритаётган бўлиб, яна 5 минг 400 таси ташкил этилади.
Ҳиндистонни трансформациялаш миллий институти 2015 йили мамлакат Бош вазири Нарендра Моди ташаббуси билан ҳукумат учун стратегик ислоҳотлар ва узоқ муддатли дастурлар ишлаб чиқиш ва ўтказиш мақсадида тузилган. Институт томонидан ташкил этилган «Atal Innovation Mission» қўмитаси якка тартибда меҳнат фаолиятига йўналтирилган инновацион хаблар, стартапларни ривожлантириш учун катталар ва болаларга махсус платформалар тақдим этиш орқали аҳоли орасида инновация ва тадбиркорлик маданиятини ёймоқда.
Мана шундай лабораторияларнинг очилиши мамлакат инновацион экотизимини ривожлантиришга ҳисса қўшади. Ҳиндистонлик ҳамкорлар билан тузиладиган бизнес акселераторлар ва инкубаторлар саноат, давлат ва ўқув муассасалари ўртасида кўприк вазифасини ўтаб, долзарб иқтисодий- ижтимоий муаммоларни ечишга хизмат қилади. Инновацион экотизимнинг мактаблардан бошлаб шаклланиши илм-фаннинг турли йўналишлари, ишлаб чиқариш, бизнес, таълим соҳаларига кадрлар етказиб беришнинг узилмас занжири ҳосил бўлишига олиб келади.
Изоҳ (0)