O‘zbekistonda 2019-yil 1-avgustga qadar mavjud mevali bog‘lar va issiqxona xo‘jaliklarining har bir fermer xo‘jaligi, qishloq xo‘jaligi korxonasi kesimida xatlovdan o‘tkaziladi. Bu Prezidentning “O‘zbyekiston Respublikasida bog‘dorchilik va issiqxona xo‘jaligini yanada rivojlantirish chora-tadbirlari to‘g‘risida”gi qarorida ko‘zda tutilgan.
Xatlov natijasida yaroqsiz va iqtisodiy jihatdan samarasiz bog‘lar va issiqxona xo‘jaliklari aniqlanadi va iqtisodiy samarador yangi bog‘lar, issiqxona xo‘jaliklarini barpo etish bo‘yicha takliflar kiritiladi.
2019-yil 1-sentabrga qadar:
keyinchalik meva mahsulotlari ishlab chiqaruvchilariga tavsiyalar berib borish maqsadida mevali ko‘chatlarning yuqori hosilli navlarini tanlab olish va ularni yetishtirishning hududiy chegaralarini aniqlash nuqtai nazaridan tabiiy-qishloq xo‘jaligi bo‘yicha rayonlashtirish amalga oshiriladi;
ishlab chiqaruvchi, yer uchastkasi, bog‘larning holati, navlar, barpo qilingan vaqti va boshqa ko‘rsatkichlarni o‘z ichiga olgan bog‘ plantatsiyalari va issiqxona xo‘jaliklarining yagona elektron reyestrini shakllantiriladi.
2019-yil 1-oktabrga qadar yetishtirilayotgan qishloq xo‘jaligi mahsulotlarining navlari, turlari va prognoz ko‘rsatkichlari, pishish vaqti to‘g‘risidagi zarur ma’lumotlarni olish imkonini beruvchi axborot platformasi ishga tushiriladi.
2020-yil 1-yanvarga qadar muddatda mavjud yer osti suv resurslarining miqdori va sifati to‘g‘risidagi ma’lumotlar ko‘rsatilgan yer osti suvlari xaritalari ishlab chiqiladi.
Respublikadagi bog‘dorchilikka ixtisoslashtirilgan tumanlarda “ishlab chiqarish – tayyorlash – saqlash – qayta ishlash – qadoqlash (tara) – tashish – ichki va tashqi bozorlarga yetkazib berish” tamoyili asosida meva savdo-logistika markazlari tashkil etiladi.
Akademik M.Mirzayev nomidagi bog‘dorchilik, uzumchilik va vinochilik ilmiy-tadqiqot instituti Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligiga o‘tkaziladi.
Izoh (0)