Sergey Aksyonov: Qrimda butun Ukrainadagidan ko‘ra ko‘proq qo‘shinlar joylashtirilgan

Qrim yarim orolda joylashtirilgan Rossiya qo‘shinlarining qudratli guruhi tufayli “egallab bo‘lmas qo‘rg‘on”ga aylantirilgan. Bu haqda respublika rahbari Sergey Aksyonov ma’lum qildi, deya xabar beradi “TASS”.

“Prezident Putinning ko‘rsatmasiga binoan mudofaa vazirligi mustahkam qalqon yaratdi. Qrim egallab bo‘lmas qal’aga aylantirilgan, shu bois barcha xotirjam uxlashi mumkin”, — dedi u.

Aksyonovga ko‘ra, yarim orolda eng zamonaviy qurol-aslahaga ega qudratli guruh joylashtirilgan. Bu Qora dengiz floti kemalari, havo va dengizdan hujumga qarshi hamda radioelektron kurash komplekslaridir. Yana havo-desant qo‘shinlari bo‘linmalari ham shay holatda.

“Hammasi mustahkam yopilgan. Hozir birgina Qrimning o‘zida butun Ukrainadagidan ko‘ra ko‘proq kuchlar bor”, — ta’kidladi Aksyonov.

Eslatib o‘tamiz, oldinroq Ukraina prezidenti Pyotr Porosheko “Qrim albatta mamlakat tarkibiga qaytarilishi”ga ishontirgandi.