Namanganning Qirg‘iziston bilan chegaradosh qishlog‘ida davlat xizmatlari markazi shoxobchasi ish boshladi

Nanay qishlog‘i viloyat markazidan 70, Yangiqo‘rg‘on tumani markazidan esa 50 kilometr uzoqda, Qirg‘iziston bilan chegarada joylashgan bo‘lib, aholi hozirga qadar hujjatlarni rasmiylashtirish uchun uzoq yo‘l bosishga majbur bo‘lardi. Endi bunga hojat qolmadi, deya xabar beradi Davlat xizmatlari agentligi Namangan viloyat boshqarmasi matbuot xizmati.

Boshqarma tashabbusi bilan Nanay qishlogida Yangiqo‘rg‘on tuman davlat xizmatlari markazining shoxobchasi faoliyat boshladi va dastlabki kunlardanoq fuqarolar og‘irini yengil qilmoqda. Jumladan, qishloqda yangi ish boshlagan “Tog‘ go‘zali” mas’uliyati cheklangan jamiyatining 170 nafar ishchi-xodimiga INN va mehnat daftarchalari rasmiylashtirilib berildi.

Mazkur shoxobcha Nanay qishlog‘idagi 11 ta va Zarkent qishlog‘ining 2 ta mahallasida istiqomat qiluvchi 17 ming fuqaroni qamrab oladi. Shu bilan birga, 2 ta maktabgacha ta’lim muassasi, 4 ta maktab va qishloqdagi kollej bitiruvchilariga 60 turdan ortiq xizmatlar ko‘rsatiladi.