Нанай қишлоғи вилоят марказидан 70, Янгиқўрғон тумани марказидан эса 50 километр узоқда, Қирғизистон билан чегарада жойлашган бўлиб, аҳоли ҳозирга қадар ҳужжатларни расмийлаштириш учун узоқ йўл босишга мажбур бўларди. Энди бунга ҳожат қолмади, дея хабар беради Давлат хизматлари агентлиги Наманган вилоят бошқармаси матбуот хизмати.
Бошқарма ташаббуси билан Нанай қишлогида Янгиқўрғон туман давлат хизматлари марказининг шохобчаси фаолият бошлади ва дастлабки кунларданоқ фуқаролар оғирини енгил қилмоқда. Жумладан, қишлоқда янги иш бошлаган «Тоғ гўзали» масъулияти чекланган жамиятининг 170 нафар ишчи-ходимига ИНН ва меҳнат дафтарчалари расмийлаштирилиб берилди.
Мазкур шохобча Нанай қишлоғидаги 11 та ва Заркент қишлоғининг 2 та маҳалласида истиқомат қилувчи 17 минг фуқарони қамраб олади. Шу билан бирга, 2 та мактабгача таълим муассаси, 4 та мактаб ва қишлоқдаги коллеж битирувчиларига 60 турдан ортиқ хизматлар кўрсатилади.
Изоҳ (0)