11-martning e’tiborga molik yangiliklari — “Daryo” dayjestida.
Andijon shahridagi “Yangi hayot” mahallasida istiqomat qiluvchi Shukurjon va Nasibaxon Qodirohunovlar xonadonida 10-farzand dunyoga keldi.
Andijon viloyati perinatal markazi shifokorlari bugun, 11-mart kuni erta tongda tug‘ruqni muvaffaqiyatli amalga oshirdi. Hozirda onaning ham, qiz farzandning ham ahvoli yaxshi.
***
Birinchi Airbus A320neo layneri Islom Karimov nomidagi Toshkent xalqaro aeroportiga yetib keldi.
Iqtisodiy samaradorligi yuqori avialaynerning parvoz masofasi 4,5 mingdan 5 ming kilometrgacha uzaytirilgani Uzbekistan Airways kompaniyasiga butun Markaziy Yevropa bo‘ylab qatnovlarni amalga oshirish imkonini beradi.
***
Namangan viloyat IIB: “Navbahor” muxlislari bo‘lgan mashina ishtirokidagi avtoavariyada 4 kishi halok bo‘ldi, 5 kishi jarohatlandi.
2019-yil 10-mart kuni soat 22.30 atrofida “Farg‘ona halqa yo‘li” avtomobil yo‘lining 69-kilometrida, To‘raqo‘rg‘on tumani hududida Nexia avtomobilini boshqargan haydovchi qarama-qarshi yo‘nalishga o‘tib ketib, qarshisidan harakatlanib kelayotgan Damas bilan to‘qnashdi.
***
Humo Arena muz saroyining ochilish marosimida Filipp Kirkorov, Nikolay Baskov va Dima Bilan ishtirok etadi.
Badiiy qismning o‘zida 2 mingdan oshiq ishtirokchi qatnashadi. Bundan tashqari, arenaga 6 mingdan ziyod muxlislar kelishi kutilmoqda. Ochilish marosimida bosh g‘oya san’at va sportni birgalikda uyg‘unlashtirib berishdir.
***
Efiopiyada bugun aviahalokatga uchragan 35 mamlakat fuqarolari uchun motam e’lon qilindi.
“Efiopiya havo yo‘llari”ning halokatga uchragan Boeing-737 layneri 157 kishining, shu jumladan 19 nafar Birlashgan millatlar tashkiloti xodimlari o‘limiga sabab bo‘ldi.
Izoh (0)